2010 වසරේදී වෙළඳ අමාත්‍යවරයාව සිටිමින් සතොස ආයතනයේ සේවකයින් පිරිසක් ඔවුන්ගේ රාජකාරිවලින් ඉවත්කොට දේශපාලන කටයුතුවල යෙදවීමෙන් රුපියල් ලක්ෂ 59කට අධික මුදලක් රජයට පාඩු කිරීම සම්බන්ධයෙන් හිටපු අමාත්‍ය ජොන්ස්ටන් ප්‍රනාන්දු මහතා ඇතුළු තිදෙනෙකුට අද (11) කොළඹ මහාධිකරණය හමුවේ අධිචෝදනා භාරදෙනු ලැබිණි.
ඒ, එම නඩුව අද කොළඹ මහාධිකරණ විනිසුරු අමල් රණරාජා මහතා ඉදිරියේ කැඳවනු ලැබූ අවස්ථාවේදී ය.
ඒ අනුව හිටපු අමාත්‍ය ජොන්ස්ටන් ප්‍රනාන්දු, සතොස ආයතනයේ හිටපු සභාපති එරාජ් ප්‍රනාන්දු සහ එහි හිටපු අධ්‍යක්ෂවරයකු වූ මොහොමඩ් සාකීර් යන අයට මෙසේ අධිචෝදනා භාරදීම සිදුකෙරිණි.
ඉන් අනතුරුව විත්තිකරුවන් රුපියල් 50,000 බැගින් වූ මුදල් ඇප සහ රුපියල් ලක්ෂ 5 බැගින් වූ ශරීර ඇප දෙකක් මත මුදා හැරීමට නියම කළ විනිසුරුවරයා ඔවුන්ගේ විදෙස් ගමන් තහනම් කිරීමටත් නියෝග කළේය.
නඩුව නොවැම්බර් 29 වනදා යළි කැඳවීමට නියමිත ය.
RN
