උපයනවිට ගෙවීමේ බද්ද හරහා වෛද්යවරුන් ඇතුළු වෘත්තීයවේදීන් බිත්තියටම හේත්තු කර ඇති බව රජයේ වෛද්ය නිලධාරීන්ගේ සංගමයේ ලේකම් හරිත අලුත්ගේ මහතා පවසයි.
“මේ උපයනවිට ගෙවීමේ බද්ද හරහා අති බහුතරයක් වෙච්ච රාජ්ය සේවකයින් හාන්සි කරලා, වෛද්යවරුන් ඇතුළු වෘත්තීයවේදීන් කාණ්ඩ බිත්තියට හේත්තු කරලා, රටේ සමස්ත මධ්යම පන්තිය හුස්ම ගන්න බැරිවෙන විදියට බෙල්ල හිරකරලා බදු අයකර ගැනීමේ උත්සාහයක් තමයි අපි දකින්නේ මේ බදු ප්රතිපත්තිය හරහා. වෛද්යවරුන් රට දාලා යනවා, මේ හරහා පර්යන්තයේ තියෙන රෝහල් ටික වැහෙන්න යනවා. රට හැරදාලා යන වෛද්යවරුන් බලහත්කාරයෙන් නවත්වාගන්නෙ කොහොමද කියලා කතා කරනවා මිසක් මේවා නිවැරදි කරන්න යම් උත්සාහයක නිරත වෙලා ඉන්නවා කියලා අපිට පේන්නෙ නෑ. මේ අවුරුද්ද ඉවර වෙනකොටත් දත්ත අපි විශ්ලේෂණය කරලා බැලුවොත්, දැන් මං දැක්කා පාර්ලිමේන්තුවේ කියනවා 300ක් ගිහිල්ලා තියෙනවා කියලා, ඒත් අපි ළඟ තියෙන දත්ත අනුව පළවෙනි මාස 8 ඇතුළත විතරක් 477ක් වෛද්යවරුන් ගිහිල්ලා තියෙනවා රට දාලා”
වෛද්ය හරිත අලුත්ගේ මහතා මේ බව පැවසුවේ ඊයේ (01) පැවති මාධ්ය හමුවක් අමතමිනි.
RN
