සටහන – රෂිකා හෙන්නායක
කොළඹ (LNW): බණ්ඩාරගම ප්‍රදේශයේ බාලවයස්කාර අවුරුදු 15ක් වයසැති දැරියකට දරුවෙකු ලැබීමේ සිදුවීමක් ළමා ආරක්ෂණ අධිකාරියට වාර්තා කිරීමට ඉඩ නොදි එය සැඟවීමට කරාපිටිය රෝහලේ විශේෂඥ ළමා ශල්‍ය වෛද්‍යවරයෙකු කටයුතු කර ඇති බව තොරතුරු වාර්තා වේ.
ඉහත සඳහන් විශේෂඥ ළමා ශල්‍ය වෛද්‍යවරයා විසින් මෙම දැරිය කරාපිටිය රෝහලේ ළමා ඒකකයට යොමුකර ඇත්තේ, අවුරුදු 14 දී ගැබිනයක වූ දැරිය ඇය විසින් බිහිකළ දරුවා අඩු බර දරුවෙකු වන බැවින් කිසියම් සංකූලතාවයක් හේතුවෙනි.
රෝහලේ නැවතී ප්‍රතිකාර ලබමින් සිටි බිළිඳා සහ මව පිළිබඳ ඇති වු සැකය මත රෝහල් කාර්ය මණ්ඩලය විසින් මව පිළිබඳව රෝහල් අධිකරණ වෛද්‍ය අංශයට දැනුම් දී ඇති අතර, මව පිළිබඳව ළමා ආරක්ෂණ අධිකාරිය වෙත දැනුම්දිය යුතු බැවින් ඒ සම්බන්ධයෙන් අදාළ කටයුතු සිදුකරමින් සිටිය දී අදාළ වෛද්‍යවරයා පැමිණ, එවැනි දැනුම්දීමක් ළමා ආරක්ෂණ අධිකාරියට සිදුකළ යුතු නොවන බව පවසා තර්ජනය කර ඇතැයි වාර්තා වේ.
පසුව අදාළ විශේෂඥ වෛද්‍යවරයා , මව සහ බිළිඳා වාටුවෙන් බලහත්කාරයෙන් ඉවත් කරගෙන ගොස් ඇත්තේ , මෙම බාලවයස්කාර දැරිය තමන්ගේ රෝගියෙකු යැයි කියමිනි.
එවැනි තීරණයක් ගැනීමට එම වෛද්‍යවරයාට නීතිමය අයිතියක් නොමැති බව රෝහල් කාර්ය මණ්ඩලය පවසන අතර , කරාපිටිය රෝහලේ අධ්‍යක්ෂවරයා සඳහන් කළේ, මෙම සිදුවීම සම්බන්ධයෙන් මේ වනවිට රෝහල් අධිකරණ වෛද්‍ය අංශයට දැනුම් දී ඇති බවයි .
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
