සටහන -නදීක දයා බණ්ඩාර
මහනුවර (LNW):අධික වර්ෂාව හමුවේ ගස් කඩා වැටීම්, පස් කදු හා ගල් පෙරලීම් ආදී විපත් පිළිබදව විමසිලිමත් විය යුතු යැයි ආපදා කළමණාකරණ මධ්‍යස්ථානයේ මහනුවර සහකාර අධ්‍යක්ෂ ඉන්දික රණවීර මහතා මහජනයාගෙන් ඉල්ලා සිටියි.
වැසි තත්ත්වය හේතුවෙන් ස්වාභාවික ආපදා ඉහළ ගොස් ඇති බැවින් මහජන ආරක්ෂාව සඳහා සියලු දෙනා විමසිලිමත් විය යුතු යැයි ද ඒ මහතා කීවේය.
වර්ෂාව හේතුවෙන් ගල් පෙරලීමකින් ගුරුදෙණිය මහ විදුහලේ ප්‍රාථමික අංශ ගොඩනැගිල්ලකට හානි වී තිබේ. ජාතික ගොඩනැගිලි පර්යේෂණ සංවිධානය හා මහනුවර දිස්ත්‍රික් ආපදා කළමණාකරණ මධ්‍යස්ථානය එම ස්ථානය පරීක්ෂා කොට පාසල් දරු දැරියන් අධ්‍යාපන කටයුතු වෙනුවෙන් වෙනත් ගොඩනැගිල්ලක් වෙත මාරු කොට තිබේ.
අයහපත් කාලගුණය හේතුවෙන් සිදුවූ ආපදා නිසා මහනුවර දිස්ත්‍රික්කයේ පවුල් 23 ක සාමාජික සාමාජිකාවන් 91 ක් මේ වන විට අවතැන් වී සිටිති. අධික වර්ෂාව, දැඩි සුළං හා ගල් පෙරලීමෙන් ආපදා වැඩි ප්‍රමාණයක් වාර්තා වී ඇත.
අධික වර්ෂාව හේතුවෙන් යටිනුවර ප්‍රාදේශීය ලේකම් කොට්ඨාශයට වැඩිම හානි සිදුවී ඇති අතර එම බල ප්‍රදේශයේ පවුල් 06ක පුද්ගලයන් 28 දෙනෙකු අවතැන් වී සිටියි. අධීක වර්ෂාව නිසා උඩුනුවර, පාතහේවාහැට, ගඟවට කොරළය, දොළුව,උඩුදුම්බර සහ තුම්පනේ ප්‍රාදේශීය ලේකම් කොට්ඨාශ වලට හානි සිදුවී තිබේ.
අවතැන් වූවන් ඥාතීන්, විහාරස්ථානයක් හා දේවස්ථානයක තාවකාලිකව රඳවා ඇති අතර මහනුවර දිස්ත්‍රික් ලේකම්වරයාගේ උපදෙස් පරිදි ඔවුන්ට අවශ්‍ය පහසුකම් සම්පාදනය කොට ඇතැයි සහකාර අධ්‍යක්ෂ ඉන්දික රණවීර මහතා සඳහන් කරයි.
