රට බංකොලොත් කර රට විනාශ කර කෝටි ප්‍රකෝටිපතියන්ට බදු සහන ලබා දී රාජ්‍ය ආදායම දළ දේශිය නිෂ්පාදිතයේ ප්‍රතිශතයක් ලෙස 12% සිට 8% දක්වා අඩු කර රටම මළ ගෙයක් කළේ වත්මන් රජය බවත් එම මළ ගෙදර ද බූරු ගසමින් තවත් මළ ගෙවල් නිර්මාණය කළේ වත්මන් රජය බවත් අන්ත දූෂිත ඖෂධ ගණුදෙනු ක්‍රියාත්මක කළ ඇමතිවරයා වෙනුවෙන් නැගි සිටියේ වත්මන් රජයේ 113 දෙනා බවත් විපක්ෂ නායක සජිත් ප්‍රේමදාස මහතා පවසයි.
සමගි ජන බලවේග සමගි ජන සන්ධාන රජයක් තුළ රටට ලබා දෙන විසඳුම් සහ උත්තර කිහිපයක් සම්බන්ධයෙන් රටත් ජනතාවත් සභාවත් දැනුවත් කරන බවත් මේ ක්‍රමවේද හරහා රට වැටි ඇති තැනින් ගොඩ ගත හැකි බවත් විපක්ෂ නායක සජිත් ප්‍රේමදාස මහතා ඊයේ (21) පාර්ලිමේන්තුවේ දී පැවසීය.
දිළිඳුකම පිටු දකින්න නව ජාතික වැඩසටහනක්
මෙරට දුප්පත් ප්‍රජාව ලක්ෂ 30 සිට ලක්ෂ 70 දක්වා වැඩි වී ඇති විට රටේ හරි අඩකට ආසන්න ප්‍රමාණයක් දුප්පත්කමින් පීඩනයෙන් අසහනයෙන් තෙරපී මිරිකී ඇති මොහොතක රට පාලනය කරන නායකයෝ හදවතේ යම් කිසි තෙතමනයක් තියාගෙන පොදුජන ජනතාව විදින දුක කදුලු වේදනාවට පැහැදිලි විසදුමක් ලබා දීමේ නව දුප්පත්කම තුරන් කිරීමේ වැඩසටහනක අවශ්‍යතාවක් ඇති බවත් හුදෙක් එය මුදල් පරිත්‍යාගයකට පමණක් සීමා නොවී දුප්පත් ප්‍රජාවගේ පාරිභෝජනය, ආයෝජනය, ඉතිරිකිරිම, නිෂ්පාදනය ආදි කරුණු කේන්ද්‍ර කර ගෙන නව දුප්පත්කම තුරන් කිරීමේ ජාතික වැඩසටහනකට මුල පුරන බවත් විපක්ෂ නායකවරයා පැවසීය.
අස්වැසුම ක්‍රියාත්මක කර ඇත්තේ දරිද්‍රතා රේඛාව හදුනා ගැනීමටත් පෙර නිසා එය විද්‍යාත්මක නොවන අසාර්ථක වැඩසටහනක් නිසා මුදල් බෙදාදීමෙන් ඔබ්බට ගියා ජීවනෝපාය ආදායම් ලබා දෙන වැඩසටහනක්, සවිබල ගැන්වීමේ වැඩසටහනකට මුල පිරිය යුතු බවත් එය ජාතික වැඩපිළිවෙළක් බවට පත් කරන බවත් තොරතුරු හා දත්ත මත පදනම්ව විද්‍යාත්මකව ජන සවියෙන් පාඩම් ඉගෙන ගත් ජන සවියෙන් ඔබ්බට ගියා දැවැන්ත ව්‍යාපාරයක් වන බවත් එය මැතිවරන පොරොන්දුවක් නොවන බවත් විපක්ෂ නායකවරයා අවධාරණය කළේය.
බැංකු පද්ධතිය සුරකිමින් පරාටේ නීතිය තාවකාලික අහෝසි කර ව්‍යාපාරිකයන් බේරා ගන්නවා
ක්ෂුද්‍ර කුඩා හා මධ්‍ය පරිමාණ කර්මාන්තකරුවන් සම්බන්ධයෙන් සමගි ජන බලවේගය දිගින් දිගටම කතා කරන විට ආණ්ඩුවේ සමහරු හිනා වූ බවත් දළ දේශීය නිෂ්පාදිතයේ ප්‍රතිශතයක් ලෙස 50%ක මෙන්ම රැකියා නියුක්තියෙන් 52%ක වඩා වැඩි දායකත්වයක් ලබා දෙන ආර්ථික ඩයිනමෝවට විරද්ධව ආණ්ඩුව කතා කළ බවත් පරාටේ නීතිය තාවකාලික විරාමයකට අහෝසි කිරීමට හෝ නොහැකි බවට ආණ්ඩුවේ පිළිතුර වූ බවත් ආණ්ඩුව පමා වෙන හැම මොහොතක් පාසා ව්‍යාපාර වැසී යන බවත් විපක්ෂ නායකවරයා පැවසීය.
රජයේ සංඛ්‍යාලේඛන අනුව ක්ෂුද්‍ර කුඩා මධ්‍ය පරිමාණ ව්‍යාපාර 59,100ක් තාවකාලිකවත් තවත් ව්‍යාපාර 204,100ක් ස්ථිරව වැසී ගොස් ඇති බවත් කාන්තා ව්‍යවසායකයින් සතු ව්‍යාපාර 10,700ක් ද 27,600ක් ස්ථිරව වැසී ගොස් ඇති බවත් 2018 වසරට සාපේක්ෂ 2023 වසර වන විට මධ්‍ය පරිමාණ ව්‍යාපාර 48.3%ක් වැසී ඇති බවත් විපක්ෂ නායකවරයා පෙන්වා දුන්නේය.
ආණ්ඩුව මේ අවස්ථාවේ සිදු කරන්නේ දේශපාලන උප්පරවැට්ටියක් වුවත් සමගි ජන බලවේග රජයක් තුළ මෙම ව්‍යාපාරිකයන් නැවතත් හිස ඔසවන තෙක් සීමාසහිත කාලයක් තුළ පරාටේ නීතිය ක්‍රියාත්මක කිරීම අත්හිටුවමින් බැංකු පද්ධතිය සුරක්ෂිත කිරිමට ජාතයන්තර මූල්‍ය ආයතනවලින් ආධාර ලබා ගෙන බැංකු පද්ධතිය ශක්තිමත් කරන බවත් විපක්ෂ නායකවරයා අවධාරණය කළේය.
සෘජු විදේශ ආයෝජන දිරිමත් කරන්න One Stop Shop සංකල්පය
අප රට බංකොලොත්භාවයෙන් ගොඩ ඒමට නම් සෘජු විදේශ ආයෝජන ප්‍රවර්ධනය කළ යුතු බවත් විදේශ ආයෝජකයන්ට එක් ආයතනයක් හරහා සියලුම අනුමත කිරීම් ලබා දෙන ආයෝජන හිතෛශී ව්‍යූහයක් වන ‘ One Stop Shop’ නිර්මාණය කරන බවත් විපක්ෂ නායකවරයා තවදුරටත් ප්‍රකාශ කළේය.
අප රටේ අපනයන සංවර්ධන මණ්ඩලය වචනයේ පරිසමාප්ත අර්ථයෙන්ම සුදු අලියෙක් බවත් ඉන් ඉටුවන කාර්යය ඉටු නොවන බවත් සමගි ජන බලවේග රජයක් තුළ ආයෝජන ආකර්ෂණය කරන රටවල්වල තානාපතිවරුන්ට ඉලක්ක ලබා දී කටයුතු කරන බවත් අසාර්ථක නම් ඉවත් කර සාර්ථක පුද්ගලයන් යොමු කර දත්ත කේන්ද්‍රීයව කටයුතු කරන බවත් විපක්ෂ නායකවරයා පැවසීය.
නොවෙනස් ස්ථිර ස්වාධීන දූෂණ විරෝධී ප්‍රතිපත්තියක්
එසේම දුෂණ විරෝධී වැඩපිළිවෙළ වත්මනේ ක්‍රියාත්මක වන ආකාරය ගැන සතුටු විය නොහැකි නිසා එය අණ පනත් හරහා නොව ආණ්ඩු ක්‍රම ව්‍යවස්ථාවේ පහසුවෙන් වෙනස් කළ නොහැකි මූලික අයිතිවාසිකම් පරිච්ඡේදය මෙන් වෙනස් කළ නොහැකි ක්‍රමවේදයක් හරහා දූෂණ විරෝධි වැඩපිළිවෙළ ස්ථාපනය කරන බවත් ස්වාධීනව, බලපෑමෙන් තොර ආයතන බවට පත් කරන බවත් විපක්ෂ නායකවරයා සඳහන් කළේය.
මෙරට බංකොලොත්භාවයට වගකිවයුතු පුද්ගලයන් කවුරුන්ද කියා අනාවරණය වී ඇති හෙයින් මෙම පුද්ගලයන් නිසා මූලික අයිතිවාසිකම්කඩ වූ පුද්ගලයන්ට වන්දි ලබා ගත හැකි වැඩපිළිවෙළක් ආරම්භ කරන බවත් ඉන් නොනැවතී මෙරටට අහිමි කළ දේපල සම්පත් හොරා කෑ අරමුදල් හා සල්ලි නැවත රටට ලබා ගෙන එම මුදල් රටේ දියුණුව වෙනුවෙන් යොදා ගන්නා බවත් විපක්ෂ නායක සජිත් ප්‍රේමදාස මහතා පැවසීය.
RN
