ASK

සංශෝධිත බදු පනත ඇතුළු කාරණා මුල්කරගනිමින් අද (13 ) සිට අරඹා තිබෙන වෘත්තීය සමිති ක්‍රියාමාර්ග අනුව රජයේ වෛද්‍ය නිලධාරීන්ගේ සංගමයද අද සිට එම වෘත්තීය සමිති ක්‍රියාමාර්ග වෙත අදියර ලෙස එක්ව සිටින අතර ඒ අනුව අද දින බස්නාහිර,මධ්‍යම,නැගෙනහිර සහ දකුණ යන පළාත් තුළ වැඩවර්ජනය ක්‍රියාත්මක කර තිබේ.

සංශෝධිත බදු පනතට විරෝධය පළකරමින් අද (13) සිට වෘත්තීය සමිති ක්‍රියාමාර්ග වලට යොමු වී සිටින අතර 15 වැනිදා එම ක්‍රියාමර්ග තීව්‍ර කිරීමට නියමිතය.

සංශෝධිත නව ආදායම් බදු පනතට එරෙහිව වරාය සේවකයින් අද (13 ) සිට 15 වැනිදා දක්වා දින දෙක තුළ අකුරට වැඩ කිරීමේ වෘත්තීය සමිති ක්‍රියාමාර්ගයේ නිරත වන අතර අසාධාරණ බදු පනත හකුළා ගැනීමට ආණ්ඩුව කටයුතු නොකරන්නේ නම් 15 වැනිදා සිට රටම ගන්නා ක්‍රියාමාර්ග සමඟ එකතු වී වරාය වැඩ බිම්වලින් ඉවත්වී වැඩවර්ජනයට යොමුවීමට තීරණය කර තිබෙන බව වරාය ශ්‍රී ලංකා නිදහස් සේවක සංගමයේ සභාපති ප්‍රසන්න කළුතරගේ මහතා අද මාධ්‍ය වෙත අදහස් දක්වමින් අවධාරණය කළේය.

අසාධාරණ බදු පනතට එරෙහිව වෘත්තිය සමිති ක්‍රියාමාර්ග උච්චතම වන දිනය 15 වැනිදා නම් එදිනට විදුලි බල සේවකයින් සියලු දෙනාද ඊට එක්වීම ස්ථිර බව ලංකා විදුලි සේවක සංගමයේ ප්‍රධාන ලේකම් රන්ජන් ජයලාල් මහතා අවධාරණය කළේය.

විදේශ සේවා නියුක්ති කාර්යාංශය මඟින් විදෙස් ගතවීමට පෙර අය කරන රක්ෂණ මුදල ඩොලර් 51 වෙනුවට එය ඩොලර් 141 දක්වා වැඩි කර විදෙස් ගතවීමට පෙරම අහිංසක ජනතාවගෙන් කප්පම් ගන්නා බව ජාතික ජන බලවේගයේ අද (11) පැවති මාධ්‍ය හමුවේදී වසන්ත සමරසිංහ මහතා අනාවරණය කළේය.