ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ ඊයේ (25) දිනයේදී බදුල්ල දිස්ත්‍රික්කයේ මහියංගණ ආසනයේ මැතිවරණ ප්‍රචාරක කටයුතුවල නිරත වූයේය.
ඔහු එහිදී ජන හමු කිහිපයකටම සහභාගී වූ අතර එහි පැමිණ සිටි ජනතාවගෙන් ඔහුට ලැබුණේ ඉතා උණුසුම් පිළිගැනීමකි.
පසුගිය සමයේදී ශ්‍රී ලංකා පොදුජන පෙරමුණ යම් පසුබෑමක සිටි නමුත් ඊට සාපේක්ෂව බැලීමේදී මෙම ජන හමු සඳහා විශාල ජන සහභාගීත්වයක් ද දක්නට ලැබිණි.
සටහන – රුවන් නෙළුගොල්ල
පළාත් පාලන මැතිවරණය වෙනුවෙන් ජනාධිපති අනුර කුමාර දිසානායක මහතා අද (අප්‍රේල් 26) දිනයේදී උතුරු පළාතේ ජන රැළි තුනකට සහභාගී වීමට නියමිතව තිබේ.
ඒ අනුව, ජනාධිපතිවරයා අද උදෑසන 09.00 ට පුදුකුඩිඉරුප්පුවේත් සවස 03.00 ට කිලිනොච්චියේත් සවස 05.00 ට වව්නියාවේත් පැවැත්වෙන ජන රැළි අමතනු ඇත.
පළාත් පාලන මැතිවරණය මැයි 06 වනදා පැවැත්වීමට නියමිත ය.
සටහන – රුවන් නෙළුගොල්ල
කටුනායක, හීනටියන ප්‍රදේශයේදී වෙඩිතැබීමක් සිදුව තිබේ.
එහිදී තුවාල ලැබූ 29 හැවිරිදි පුද්ගලයකු ප්‍රතිකාර සඳහා ගම්පහ රෝහලට ඇතුළත් කර ඇත.
තම නිවසේ සිටි එම පුද්ගලයාට යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් මෙසේ වෙඩිතබා පළාගොස් ඇති බව සඳහන්.
සටහන – රුවන් නෙළුගොල්ල
ශ්‍රී ලංකාවේ අංක එකේ ව්‍යාපාරිකයා වශයෙන් සැලකෙන ධම්මික පෙරේරා මහතා ඉන්දියානු – ශ්‍රී ලංකා හවුල් ව්‍යාපාරයක් වන DHT සිමෙන්ති සමාගමේ (DHT Cement Pvt. Ltd.) 51%ක පාලක කොටස් හිමිකර ගනිමින් තරගකාරී සිමෙන්ති නිෂ්පාදන කර්මාන්තය අවතීර්ණ වී තිබේ.
DHT සිමෙන්ති සමාගම “පවර්ටෙක් ප්‍රීමියම් සිමෙන්ති” සන්නාමය යටතේ සිය නිෂ්පාදන වෙළඳපොලට නිකුත් කරයි. ව්‍යාපාරික ධම්මික පෙරේරා මහතා මෙහි පාලක කොටස් හිමිකම අත්පත් කරගෙන ඇත්තේ සිය අතිදැවැන්ත ආයෝජන හස්තය වන “වැලිබල් වන්” සමූහය යටතේ ස්ථාපිත නවතම සමාගම වන “වැලිබල් ටූ ප්‍රයිවට් ලිමිටඩ්” හරහා ය.
මෙහි 51%ක කොටස් හිමිකම අත්පත් කරගැනීම සඳහා ධම්මික පෙරේරා මහතා DHT සිමෙන්ති සමාගමේ මුල් කොටස් හිමියන් සිව්දෙනෙකුගෙන් (ඉන්දියානුවන් දෙදෙනෙක් සහ ශ්‍රී ලාංකිකයින් දෙදෙනෙක්) සාමුහිකව ඇමරිකානු ඩොලර් මිලියන 08ක් ගෙවා සමාන කොටස් මිලදීගෙන ඇති අතර එම සමාගම විසින් නිකුත් කළ නව කොටස් මිලදී ගැනීම සඳහා ඔහු තවත් ඇමරිකානු ඩොලර් මිලියන 12ක් ආයෝජනය කර ඇත. ඒ අනුව වැලිබල් ටූ සමාගමේ මෙම සිමෙන්ති ව්‍යාපාරය සඳහා කර ඇති මුළු ආයෝජනය ඇමරිකානු ඩොලර් මිලියන 20 කි.
ඒකල ප්‍රදේශයේ පිහිටා ඇති DHT සිමෙන්ති සමාගමේ කර්මාන්ත ශාලාව උසස් ජර්මානු තාක්ෂණයෙන් සමන්විත වන අතර මෙහෙයුම් කාර්යක්ෂමතාව සහ පාරිසරික ආරක්ෂාව යන ක්ෂේත්‍ර දෙකෙහිම ඉදිරියෙන් සිටින බව සඳහන්. මෙම සමාගම PowerTech Premium සන්නාමය යටතේ සියලුම වර්ගයේ ව්‍යාපෘති සඳහා සිමෙන්ති කොට්ට අලෙවි කරන අතර එය මහා පරිමාණ ඉදිකිරීම් ව්‍යාපෘති සඳහා තොග සිමෙන්ති ද සපයයි.
පැයකට සිමෙන්ත්‍රි මෙට්‍රික් ටොන් 80ක් නිෂ්පාදනය කිරීමේ ධාරිතාවක් සහිතව ස්ථාපිත කර ඇති DHT සිමෙන්ති සමාගමේ කර්මාන්ත ශාලාව අනුව එම සමාගමට මෙරට සිමෙන්ති වෙළඳපොලේ 10%ක පමණ පරිමාණයක් සැපයිය හැකි බවට ඇස්තමේන්තු කර ඇති අතර ධම්මික පෙරේරා මහතාගේ ආයෝජනයෙන් පසුව එය තවත් ඉහළ යනු ඇතැයි අපේක්ෂා කෙරේ.
PowerTech Premium සිමෙන්ති සඳහා SLS 107 තත්ව සහතිකය ඇති අතර ISO 9001:2015 තත්ව සහතිකය ද ඊට හිමි ය.
මෙසේ සිමෙන්ති නිෂ්පාදන කර්මාන්තයට ද අවතීර්ණ වන ධම්මික පෙරේරා මහතාගේ දැවැන්ත ව්‍යාපාර ජාලය තුළ දැනටමත් ඉදිකිරීම් ක්ෂේත්‍රයට සම්බන්ධ ටයිල්, නානකාමර උපාංග, ඇලුමීනියම්, සූර්ය විදුලි පැනල ඇතුළු නිෂ්පාදන කිහිපයක්ම අඩංගු වේ.
සටහන – රුවන් නෙළුගොල්ල
ජාත්‍යන්තර මූල්‍ය අරමුදල ශ්‍රී ලංකාවට ලබාදී ඇති විස්තීර්ණ ණය පහසුකම් වැඩසටහනේ සිව්වැනි සමාලෝචනයට අදාළව ආර්ථික ප්‍රතිපත්ති පිළිබඳව ජාත්‍යන්තර මූල්‍ය අරමුදලේ කාර්ය මණ්ඩලය සහ ශ්‍රී ලංකා බලධාරීන් නිලධාරී මට්ටමේ එකඟතාවකට පැමිණ තිබේ.
මෙම සමාලෝචනය ජාත්‍යන්තර මූල්‍ය අරමුදලේ විධායක මණ්ඩලය විසින් අනුමත කිරීමෙන් පසුව ශ්‍රී ලංකාවට තවත් එක්සත් ජනපද ඩොලර් මිලියන 344ක පමණ මූල්‍යයන පහසුකමක් සඳහා ප්‍රවේශය හිමිවනු ඇත.
ඒ සමග ශ්‍රී ලංකාවට ජාත්‍යන්තර මූල්‍ය අරමුදලෙන් ඉහත කී ණය පහසුකම යටතේ මේ දක්වා ලැබෙන මුදල ඩොලර් මිලියන 1,722 ක් දක්වා ඉහළ යනු ඇත.
මේ සම්බන්ධයෙන් නිකුත් කර ඇති සම්පූර්ණ නිවේදනය පහතින් දැක්වේ.
සටහන – රුවන් නෙළුගොල්ල
වැලිගම W15 හෝටලයට වෙඩිතැබීමේ සිද්ධියට අදාළව රක්ෂිත බන්ධනාගාරගතව සිට අප්‍රේල් 10 වනදා ඇප මත නිදහස්ව මාතර මහේස්ත්‍රාත් අධිකරණ භූමියෙන් පිටව යන අවස්ථාවේදී අධිකරණය ලබාදී තිබූ නියෝගයක් කඩකිරීම හරහා පොලිස්පති දේශබන්දු තෙන්නකෝන් අධිකරණයට අපහාස කර ඇති බව මාතර මහේස්ත්‍රාත් අධිකරණය අද (අප්‍රේල් 25) ප්‍රකාශ කළේය.
ඒ අනුව, මුල් අවස්ථාවේදී අධිකරණයට අපහාස කිරීම සම්බන්ධයෙන් නඩු පැවරීමට මහේස්ත්‍රාත් අධිකරණයට බලයක් නොමැති නිසා දේශබන්දු තෙන්නකෝන්ට එරෙහිව අභියාචනාධිකරණය හමුවේ නඩු පවරන ලෙසයි මාතර මහේස්ත්‍රාත් අධිකරණය නියෝග කර ඇත්තේ.
පසුගිය අප්‍රේල් 10 වනදා ඇප ලැබුණු දේශබන්දු තෙන්නකෝන්ට විශේෂ ආරක්ෂාවක් යටතේ තම මෝටර් රථය අධිකරණ භූමිය තුළටම ගෙන්වා ගෙන පිටව යාමට අවසර ලබාදෙන ලෙස ඔහුගේ නීතීඥවරයා අධිකරණයෙන් ඉල්ලා තිබුණු නමුත් මහේස්ත්‍රාත්වරයා ඊට අවසර ලබාදී තිබුණේ නැත. එසේවෙතත් අධිකරණ භූමිය තුළට ගෙන්වා ගත් සුඛෝපභෝගී මෝටර් රථයකින් දේශබන්දු තෙන්නකෝන් පිටව යන ආකාරය මාධ්‍ය වාර්තා කර තිබිණි.
සටහන – රුවන් නෙළුගොල්ල
සිරි දළදා වන්දාව පෙර සැලසුම් කළ පරිදිම අප්‍රේල් 27 වනදා දක්වා පමණක් පැවැත්වීමට තීරණය කර ඇති බව ශ්‍රී දළදා මාළිගාවේ දියවඩන නිළමේ තැන්පත් ප්‍රදීප් නිලංග දෑල මහතා පවසයි.
ඒ අනුව සිරි දළදා වන්දනාවේ දිනයන් කිසිසේත්ම දීර්ඝ නොකරන බවයි දියවඩන නිළමේවරයා සඳහන් කළේ.
ජාතික ජන බලවේගයේ රජය බලයට පත්වී මාස හයක් ගතවී ඇතත් කිසිදු වැඩක් කර නොමැති බවත් මේ මැතිවරණයේදී ඔවුන් භාවිතා කරන්නේ අපහාසය, උපහාසය හා තර්ජනය බවත් සමගි ජන බලවේගයේ පාර්ලිමේන්තු මන්ත්‍රී නලින් බණ්ඩාර පවසයි.
“මේ ඉස්සරහා ඉන්න අපේ අපේක්ෂකයො හොරු ලු. ඉස්සර කිව්වා 225 ම හොරු කියලා. මිනිස්සුන්ට අපහාස කරන එක, උපහාස කරන එක සහ තර්ජනය කරන එක තමයි මේ මැතිවරණයේදී ආණ්ඩුව පාවිච්චි කරන ක්‍රමය. මොකද, මාස හයක් ගතවුණා වැඩක් කරලා නෑ. කයිය විතරයි, පච විතරයි, මුසාවාද විතරයි. තර්ජනය කළේ කොහොමද, සල්ලි දෙන්නෙ නෑ, ප්‍රාදේශීය සභාවලට සල්ලි දෙන්නෙ නෑ, මාලිමාව දිනවපල්ලා කියලා. යකෝ මාලිමාව දිනවන්න ඉල්ලන මිනිස්සුවත් ගමේ මිනිස්සු දන්නෙ නෑ”
නලින් බණ්ඩාර මන්ත්‍රීවරයා මේ බව පැවසුවේ ඊයේ (අප්‍රේල් 24) කුලියාපිටියේදී පැවති සජබ මැතිවරණ ප්‍රචාරක රැස්වීමක් අමතමිනි.
අද (අප්‍රේල් 25) සවස් කාලයේදී හෝ රාත්‍රී කාලයේදී නැගෙනහිර, ඌව, මධ්‍යම, උතුරු සහ උතුරු-මැද පළාත්වලත් හම්බන්තොට දිස්ත්‍රික්කයේත් තැනින් තැන ගිගුරුම් සහිත වැසි සමග ප්‍රබල අකුණු ඇතිවීමේ වැඩි හැකියාවක් පවතින බව කාලගුණ විද්‍යා දෙපාර්තමේන්තුව පවසයි.
මේ සම්බන්ධයෙන් ආරක්ෂිත පියවර ද සඳහන් කරමින් එම දෙපාර්තමේන්තුව නිකුත් කර ඇති නිවේදනය පහතින් දැක්වේ.
මහනුවර “සිරි දළදා වන්දනාව” දළදා ප්‍රදර්ශනයේ රාජකාරියේ යෙදී සිටි පොලිස් නිලධාරීන් දෙදෙනෙකු මරණයට පත්ව තිබේ.
ඔවුන් දෙදෙනා ද මියගොස් ඇත්තේ හෘදයාබාධ හේතුවෙන් බව සඳහන්.
ඔවුන් සම්බන්ධයෙන් ශ්‍රී ලංකා පොලීසියේ නිල ෆේස්බුක් පිටුවේ තබා ඇති සටහන පහතින් දැක්වේ.
දළදා වන්දනාව සඳහා පැමිණි බැතිමතුන් සිව්දෙනෙකු ද මරණයට පත්ව තිබුණු බව ඊයේ (24) දිනයේදී මාධ්‍ය වාර්තා කර තිබිණි.