රෂිකා හෙන්නායක ජනවාරි 13, කොළඹ (LNW):
හෙට (14) සිට ජනාධිපති අනුර කුමාර දිසානායක මහතා චීනයේ නිල සංචාරයක නිරත වන අතර, ජනාධිපති ධුරයට පත්වීමෙන් පසු ඒ මහතා සහභාගී වන දෙවන විදෙස් නිල සංචාරය මෙය වේ.
ශ්රී ලංකා ජනාධිපතිවරයාගේ චීන සංචාරය දෙරටේ සබඳතා වර්ධනයට වැදගත් සන්ධිස්ථානයක් වනු ඇති බව, මේ සම්බන්ධයෙන් විශේෂ නිවේදනයක් නිකුත් කරමින් චීනය අවධාරණය කරයි.
ජනාධිපති අනුර කුමාර දිසානායක මහතා හෙට (14) සිට ලබන 17 වනදා දක්වා චීනයේ නිල සංචාරයේ නිරත වන අතර, චීන විදේශ අමාත්යාංශය මෙම සංචාරය සම්බන්ධයෙන් විශේෂ මාධ්ය හමුවක් පැවැත්වූ බව සඳහන් වේ. අනුර කුමාර දිසානායක මහතා ජනාධිපති ධුරයට පත්වීමෙන් පසු චීනයේ නිල සංචාරයක නිරත වන පලමු අවස්ථාව මෙය බවත්, මෙය දෙරටේ සබඳතා වර්ධනයට ඉතා වැදගත් බව ඒ මහතා පෙන්වා දුන් බවත්, චීන විදේශ අමාත්යාංශයේ ප්රකාශක ගෝජියා කුන් මහතා එහිදී ප්රකාශ කළේය.
මෙම සංචාරයේදී අනුර කුමාර දිසානායක මහතා චීන ජනාධිපති ක්ෂී ජින්පින්ග් මහතා හමුවී සාකච්ඡා පැවැත්වීමට නියමිත අතර, චීන අග්රාමාත්ය ලී කර්චියෑන්ග් මහතා චීන මහජන ජාතික කොංග්රසයේ ස්ථාවර කමිටුවේ සභාපති චඕ ලචී යන මහත්වරුන් සමග ද සාකච්ඡා පවත්වන බව චීන විදේශ අමාත්යාංශය සඳහන් කළේය.
චීන මාධ්ය වාර්තා කරන්නේ, අන්යාන්ය සහයෝගීතාවයෙන් සිය සබඳතා පවත්වාගෙන යන චීනය සහ ශ්රීලංකාවට තවදුරටත් සබඳතා වර්ධනය සඳහා අනුර කුමාර දිසානායක මහතාගේ චීන සංචාරය වැදගත්වන බවයි.
චීන විදේශ කටයුතු අමාත්යාංශය අවධාරණය කරන්නේ, එක් තීරයක් එක් මාවතක් වැඩපිළිවෙල සංවර්ධනය කරමින් දේශපාලන අන්යයනොන්ය විශ්වාසය තහවුරු කර ගැනීමට චීනය කැමැත්තෙන් සිටින අතර, ඒ තුළින් දෙරට අතර පවතින දීර්ඝකාලීන සබඳතාව දෙරටටම වැදගත් වන පරිදී තහවුරු කර ගැනීමට හැකි බවයි.
