සටහන: සශිකලා මධුෂාණි
පෙබරවාරි 04: ලෝකය(අවුට්බවුන්ඩ් ටුඩේ) : කැනඩාව සහ මෙක්සිකෝව මත 25% තීරුබදු පැනවීම දින 30 කට අත්හිටුවීමට ජනාධිපති ඩොනල්ඩ් ට්‍රම්ප් එකඟ වී ඇති බව වාර්තා වේ.
කැනේඩියානු අගමැති ජස්ටින් ටෘඩෝ, සංක්‍රමණය සහ මාරාන්තික මත්ද්‍රව්‍ය ෆෙන්ටැනයිල් ගලායාම වැළැක්වීම සඳහා එක්සත් ජනපදය සමඟ තම රටේ දේශසීමා ශක්තිමත් කිරීමට එකඟ වීමත්, හමුදා සමඟ උතුරු දේශසීමාව ශක්තිමත් කිරීමට මෙක්සිකානු ජනාධිපති ක්ලෝඩියා ෂයින්බෝම් එකඟ වීමත්, කැනඩාව සහ මෙක්සිකෝව ඇමරිකානු භාණ්ඩ වෙනුවෙන් බදු පැනවීමත් සමඟ මෙම තීරණය ගෙන තිබේ.
ඒ අනුව,කැනේඩියානු අගමැති ජස්ටින් ටෘඩෝ සඳහන් කර තිබුණේ, හෙරොයින් වලට වඩා 50 ගුණයක් ශක්තිමත් කෘත්‍රිම මත්ද්‍රව්‍යයක් වන ෆෙන්ටැනයිල් ගලායාම නැවැත්වීම සඳහා පෙරටුගාමී සේවකයින් 10,000කට ආසන්න ප්‍රමාණයක් සහ තවත් සම්පත් ඇතුළත් ඩොලර් බිලියන 1.3 (පවුම් බිලියන 1) දේශසීමා සැලැස්මක් කැනඩාව ක්‍රියාත්මක කරන බවයි. මෙහිදී අපරාධ, ෆෙන්ටැනයිල් සහ මුදල් විශුද්ධිකරණයට එරෙහිව සටන් කිරීම සඳහා එක්සත් ජනපද නීතිය බලාත්මක කිරීම, වැඩි දියුණු කළ සම්බන්ධීකරණය, තොරතුරු හුවමාරු කිරීම, දේශසීමාවේ ගමනාගමනය සීමා කිරීම සහ නිරීක්ෂණ සඳහා ඩ්‍රෝන සහ බ්ලැක් හෝක් හෙලිකොප්ටර් යෙදවීම ඇතුළත් වේ.
තීරුබදු පැනවීම තාවකාලිකව අත්හිටුවීමත් සමඟ මෙක්සිකානු ජනාධිපති ක්ලෝඩියා ෂයින්බෝම් දේශසීමා ආරක්ෂාව වෙනුවෙන් රට ජාතික ආරක්ෂක භටයින් 10,000 ක් එක්සත් ජනපදය සමඟ ඇති දේශසීමා වෙත යොදවා තිබුණු අතර මේ සම්බන්ධයෙන් ඩොනල්ඩ් ට්‍රම්ප් සිය සමාජ මාධ්‍ය වේදිකාවේ සඳහන් කර තිබුණේ, සියලුම ඇමරිකානුවන්ගේ ආරක්ෂාව සහතික කිරීම තමන්ගේ වගකීමක් වන බවත්, තමා එය සිදු කිරීමට සුදානම් බවත්, මෙම ආරම්භක ප්‍රතිඵලය ගැන තමා ඉතා සතුටු වන බවත්ය.
ට්‍රම්ප් එක්සත් ජනපද ආර්ථිකය වර්ධනය කිරීම, රැකියා ආරක්ෂා කිරීම සහ බදු ආදායම ඉහළ නැංවීම සඳහා මෙවලමක් ලෙස තීරුබදු සකස් කර ඇත.
