පළාත් පාලන මැතිවරණය පැවැත්වීම සඳහා මුදල් ලබාදීමට අසීරු බව මුදල් අමාත්‍යාංශ ලේකම් මහින්ද සිරිවර්ධන මහතා මැතිවරණ කොමිසමට දැනුම් දී තිබේ.
මුදල් අමාත්‍යාංශ ලේකම්වරයා ඇතුළු නිලධාරීන්ව ඊයේ (17) දිනයේදී මැතිවරණ කොමිසම හමුවට කැඳවා සිදුකරන ලද සාකච්ඡාවේදී ඔවුන් මේ බව දැනුම් දුන් බවයි මැතිවරණ කොමිසමේ සභාපති නිමල් පුංචිහේවා මහතා සඳහන් කළේ.
පවතින මූල්‍ය අර්බුදය හමුවේ පසුගියදා නිකුත් කෙරුණු චක්‍රලේඛයක් අනුව මුදල් වෙන් කළ හැක්කේ අත්‍යාවශ්‍ය සේවාවන් සඳහා පමණක් බවත් එම චක්‍රලේඛයෙන් රාජ්‍ය සේවක වැටුප්, විශ්‍රාම වැටුප්, සහනාධාර, සෞඛ්‍ය වියදම් යනාදිය අත්‍යාවශ්‍ය සේවාවන් වශයෙන් නම් කර ඇතත් මැතිවරණ කටයුතු අත්‍යාවශ්‍ය සේවාවක් වශයෙන් නම් කර නොමැති බවත් එම නිලධාරීන් පෙන්වා දී ඇත.
එමෙන්ම අත්‍යාවශ්‍ය සේවා ගණයට අයත් නොවන ආයතන වෙත මුදල් නිකුත් කිරීමට නම් ඒ සඳහා මුදල් අමාත්‍යවරයාගේ අනුමැතිය ලබාගත යුතු බවට තවත් චක්‍රලේඛයක් නිකුත් කර ඇති බවත් එම නිලධාරීන් වැඩිදුරටත් ප්‍රකාශ කර ඇති බව සඳහන්.
RN
