කුරුණෑගල ශික්ෂණ රෝහලේ වකුගඩු රෝගීන් සඳහා ප්‍රතිකාර කෙරෙන රුධිර කාන්දු කරණ ප්‍රතිකාර ඒකකය තාවකාලිකව වසා දමා තිබේ.
ඒ, පසුගිය මාසයක පමණ කාලයක් තුළ එම ඒකකයෙන් ප්‍රතිකාර ලබාගත් වකුගඩු රෝගීන් පස්දෙනෙකු පමණ මියයාම සැලකිල්ලට ගනිමිනි.
යම් විෂබීජ ආසාදනයක් හෝ රුධිර කාන්දුකරණය සඳහා භාවිතා කරන රසායනික ද්‍රව්‍ය හෝ උපකරණවල ගැටලුවක් මීට හේතුවී ඇත්ද යන්න සම්බන්ධයෙන් රෝහල් මට්ටමින් පරීක්ෂණයක් සිදු කළ ද එයින් නිශ්චිත හේතුවක් අනාවරණ කරගැනීමට නොහැකි වී තිබේ.
ඒ අනුව පෙබරවාරි 23 වනදා සිට මෙම ඒකකය තාවකාලිකව වසා දමා ඇති අතර එය යථා තත්වයට පත් කරන තුරු ඊට පැමිණෙන රෝගීන් වෙනත් රෝහල් කරා යොමුකිරීමට පියවර ගෙන ඇත.
මෙම තත්වය පිළිබඳ සොයාබැලීම සඳහා සෞඛ්‍ය අමාත්‍යාංශය විසින් පස්දෙනෙකුගෙන් සමන්විත විද්වත් කමිටුවක් ද පත්කර ඇති බවයි සෞඛ්‍ය අමාත්‍යාංශ ලේකම් පාලිත මහීපාල මහතා නිවේදනය කරන්නේ.
RN
