Tuesday, October 4, 2022

Latest Posts

අපි මහ බැංකු අධිපතිවරයා මුණ ගැසුණේ ඇයි? හර්ෂ පැහැදිලි කරයි

සමගි ජන බලවේගයේ ආර්ථික ප්‍රතිපත්ති කණ්ඩායම නියෝජනය කරමින් කබීර් හෂීම්, ඉරාන් වික්‍රමරත්න සහ ආචාර්ය හර්ෂ ද සිල්වා යන පාර්ලිමේන්තු මන්ත්‍රීවරු අද (09) පෙරවරුවේ ශ්‍රී ලංකා මහ බැංකුවේ අධිපති අජිත් නිවාඩ් කබ්රාල් මහතා සහ මහ බැංකුවේ ජ්‍යෙෂ්ඨ නිළධාරීන් හමුවූ අතර, එහිදී රට මුහුණ පා ඇති ආර්ථික අර්බුදය විසඳීම සඳහා ගතයුතු ක්‍රියාමාර්ග පිළිබඳව කරුණු සාකච්ඡා කළහ.

මෙම හමුවීම සම්බන්ධයෙන් පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා පවසා සිටියේ, වගකිව යුතු විපක්ෂයක් ලෙස රට පිළිබඳව ඔවුනට වගකීමක් තිබෙන නිසා ආර්ථිකය හසුරුවන මහ බැංකු අධිපතිවරයාට සහ මහ බැංකුවේ ජ්‍යෙෂ්ඨ නිළධාරීන්ට තම යෝජනා ඉදිරිපත් කළ බවයි.

මේ අවස්ථාවේ දේශපාලන පක්ෂ පාට බේදයකින් තොරව තම යෝජනා ක්‍රියාත්මක කරන්නේ නම් එයින් මේ අර්බුදය විසඳා ගැනීමට මග පෑදෙනු ඇතැයි තමා විශ්වාස කරන බව ද පාර්ලිමේන්තු මන්ත්‍රීවරයා නිවේදනයක් නිකුත් කරමින් පවසයි.

මෙම ආර්ථික අර්බුදය කෙටි කාලීන ද්‍රවශීලතා ගැටලුවක් යැයි මහ බැංකුව සිතා සිටියත් මෙය එසේ නොවන බව පෙන්වා දෙන මන්ත්‍රීවරයා වැඩිදුරටත් පවසා සිටියේ, පවතින තත්ත්වය අනුව රට බංකොලොත් වීමේ අවදානමක් දක්වා මෙම ආර්ථික අර්බුදය දිග් ගැස්සී තිබෙන බවත් මේ නිසා මෙරට ණයවල තිරසාරත්වය විශ්ලේෂණය කර ඒවා ප්‍රතිව්‍යුහගත කිරීමට අවධානය යොමුකළ යුතු බවත් ඔවුන් අවධාරණය කළ බව ය.

කෙසේවෙතත්, මූල්‍ය අරමුදලේ සහාය ලැබීමට මහ බැංකුව උනන්දුවක් දක්වන බවක් මෙහිදී නොපෙනුන බවත්, හදිසි ණය තිරසාරත්ව විශ්ලේෂණයක් සහ සැලසුමක් සිදුකර ණය ප්‍රතිව්‍යුහගත කිරීමේ වැදගත්කම තමා ඇතුළු පිරිස දැඩිව අවධාරණය කළ බවත් මන්ත්‍රීවරයා සිය නිවේදනය හරහා පෙන්වා දෙයි.

එසේම,⁣ මෙරට ආහාර උද්ධමනය සියයට 40% ක් දක්වා වැඩිවී තිබෙන බවත් එය ජනතාවට දරාගැනීමට නොහැකි නිසා එය වහාම පහළ දැමීමට පියවර ගත යුතු බවත් තමා මහබැංකු අධිපතිවරයාට සඳහන් කළ බව ද හෙතෙම පැවසීය.

LEAVE A REPLY

Please enter your comment!
Please enter your name here

Latest Posts

spot_img

Don't Miss

Stay in touch

To be updated with all the latest news, offers and special announcements.