පාස්කු ප්‍රහාරය සැබැවින්ම එල්ල කළේ කවුරුන්දැයි තමන් දන්නා බවට කළ ප්‍රකාශය සම්බන්ධයෙන් හිටපු ජනාධිපති මෛත්‍රීපාල සිරිසේන මහතා වැඩිදුර කරුණු පැහැදිලි කිරීමක් සිදුකර තිබේ.
“මීට සති තුනකට විතර පෙර මට ලැබුණු තොරතුරක් අනුව තමයි මම ඊයේ ඒ ප්‍රකාශය කරනු ලැබුවේ. ඒ අනුව මම එවෙලේම කිව්වා අධිකරණයට මට මේ ගැන ප්‍රකාශයක් කිරීමට අවශ්‍යයයි, ඒක නිසා මම විශ්වාස කරනවා කියලා මම අධිකරණයෙන් ඉල්ලීමක් කළා. ඒ වගේම ඒ ප්‍රකාශය මම අධිකරණයට දෙන්නෙත් විනිශ්චයකාරතුමාලා – මම දන්නෑ මම නීතිඥවරයෙක් නෙවෙයි, ඒක නිසා මොන විදිහේ උසාවියකටද මේක යොමු කළ යුත්තේ කියලා, නැත්නම් මාව කැඳවිය යුත්තේ කියලා මම දන්නෙ නැහැ – ඒ කුමන හෝ උසාවියකට මාව කැඳවපුවාම මම ගිහිල්ලා ඒ විනිශ්චයකාරතුමාලාට මම රහසිගත තොරතුරක්, සාක්ෂියක් තමයි මම දෙනවා කියලා ඊයෙත් කිව්වෙ. ඒක නිසා ඒ අනුව තමයි මම කටයුතු කරන්නෙ. මේ පිළිබඳව බොහෝ වැරදි මතයන් ප්‍රකාශ වෙනවා. ප්‍රධාන වශයෙන් මම කියන්න ඕනෙ මේක මේ දේශපාලන වශයෙන් මේ ඡන්ද කාලෙ කිට්ටුයි කියලා, මම දැක්කා ඇතැම් මාධ්‍යවල සහ සමාජ මාධ්‍යවල තියෙනවා මේ මැතිවරණ කාලෙ ළංවෙලා මේ ප්‍රකාශයක් කරන්නෙ කියලා. මැතිවරණ කාලෙ ළංවෙච්ච හින්දා නෙවෙයි, මේ සම්බන්ධයෙන් මට යම් තොරතුරක් ලැබිච්ච නිසා, ප්‍රධාන වශයෙන්ම අධිකරණවල දැනට පැවැත්වෙන පරීක්ෂණවලට එයින් යම්කිසි සහයෝගයක්, විනිශ්චයකාරතුමාලාට මේ පිළිබඳව යම් අවබෝධයක් ලබාගැනීමට පුළුවන් වෙයි කියලා මම හිතනවා. ඒ නිසායි මම විශේෂයෙන්ම මේ ප්‍රකාශය කරනු ලැබුවේ. ඒක නිසා අධිකරණයකින් මට නියෝගයක් ලැබුණොත් පෙනී හිටින්න කියලා මම රහසිගත සාක්ෂියක් දීමට බලාපොරොත්තු වෙනවා. රහසිගත සාක්ෂියක් දෙන්නෙ වෙන හේතුවක් නිසා නෙවෙයි විවෘත සාක්ෂියක් දුන්නොත් අධිකරණයේ, මම දන්නවා පැහැදිලිවම මගේ ජීවිතය සහ සමහරවිට මගේ දරුපවුල පවා විනාශ කරන්න පුළුවන්. ඒක නිසා මේක කිසිම දේශපාලන මතවාදී හෝ දේශපාලන යම්යම් ප්‍රශ්නවලට ගෑවිච්ච කාරණයක් නෙවෙයි, මම ඉතාම අවංකව කරන ප්‍රකාශයක්”
මෛත්‍රීපාල සිරිසේන මහතා මේ බව පැවසුවේ ඊයේ (23) කොළඹදී මාධ්‍ය වෙත ප්‍රකාශයක් සිදුකරමිනි.
RN
