නවවැනි පාර්ලිමේන්තුවේ පස්වැනි සභාවාරය සඳහා ආර්ථික ස්ථායීකරණය පිළිබඳ කාරක සභාවේ සභාපතිවරයා ලෙස රාජ්‍ය අමාත්‍ය තාරක බාලසූරිය මහතා ඒකමතිකව පත්කරගෙන තිබේ.
ඒ එම කාරක සභාව පසුගියදා මුල්වරට රැස්වූ අවස්ථාවේදී ය.
එහිදී රාජ්‍ය අමාත්‍ය කනක හේරත් මහතා විසින් සභාපති ධුරය සඳහා තාරක බාලසූරිය මහතාගේ නම යෝජනා කර ඇති අතර පාර්ලිමේන්තු මන්ත්‍රී සී.බී. රත්නායක මහතා විසින් එය ස්ථිර කර ඇත.
ආර්ථීක ස්ථායීකරණය පිළිබඳ කාරක සභාවේ විෂය පථය, පොදු ව්‍යාපාර පිළිබඳ කාරක සභාවේ විෂය පථය හා සමාන වන බව පෙන්වා දී ඇති සභාපතිවරයා එම විෂය පථයන් වෙනස් කිරීමේ අවශ්‍යතාව එදින අවධාරණය කර ඇති අතර ආර්ථිකය පිළිබඳ සියලු අංශ ආවරණය වන පරිදි කාරක සභාවේ විෂය පථය පුළුල් කළ යුතු බවද යෝජනා කර තිබේ.
කෙසේ වෙතත් එම විෂයපථයන් වෙනස් කිරීම සම්බන්ධයෙන් මෙතෙක් අවසන් තීරණයක් ගෙන නොමැති බැවින් කාරක සභා සාමාජිකයින්ට සහ අදාළ පාර්ශ්ව වලට එහි සිදුවිය යුතු වෙනස්කම් පිළිබඳව සාකච්ඡා කළ හැකි බවත් කාරක සභා සභාපතිවරයා පෙන්වා දී ඇත.
ඒ අනුව ඉදිරි දිනක මේ සම්බන්ධයෙන් විශේෂ රැස්වීමක් පැවැත්වීමට කාරක සභාව තීරණය කරන ලදී.
RN
