බරපතළ ලිංගික දූෂණයකට ලක් වුණු අනුරාධපුර දැරිය සම්බන්ධ නඩුවේ නීතිමය ක්‍රියාකාරිත්වය අපේ රටේ නීතිය ක්‍රියාත්මක වීමේදී අසමාන ලෙස සැලකීම ගැන හොඳම උදාහරණයක්.
සැකකාර පල්ලේගම හේමරතන හිමි අත්අඩංගුවට ගැනීමට පොලිසියේ පසුබෑම, අධිකරණ නියෝගය නොතකා මේ දක්වා ඔහු නවලෝක රෝහලේ තැබීම.. විතරක් නෙවෙයි, සැකකාර හිමිනම වෙනුවෙන් ජනාධිපති නීතිඥවරයෙකු ඇතුළු 30කට අධික නීතිඥ මඬුල්ලක් පෙනී ඉද්දි දැරිය වෙනුවෙන් පෙනී ඉන්නෙ කවුද? නිට්ටඹුව මූලස්ථාන පොලිස් පරීක්ෂක ඇතුළු පොලිස් නිලධාරීන් කිහිප දෙනෙක්. අඩුම තරමෙ ඇය වෙනුවෙන් එකම එක නීතිඥයෙක් ඉදිරිපත් කරන්න තරම් හැකියාවක් ජාතික ළමාරක්ෂක අධිකාරියට නෑ. ඔවුන් කරන්නෙ බලා ඉන්න එක විතරයි. අධිචෝදනා දෙන්න පෙර වුණත් – නීතිපතිට බලය තියනවා දැරිය වෙනුවෙන් නීතිඥයෙක් යොදවන්න.
හැබැයි බැලූ බැල්මට පේන්න තියන දේ මොකක්ද? සියලු බලයන් ඒකරාශි වුණ තැන තලා දමපු මලක් වගේ මේ දැරිය අසරණ වෙලා තියන එක.
මොකක්ද වාමාංශික කියාගත්ත මේ ආණ්ඩුවෙ ලැජ්ජ නැතිකම.. නීතිපති දෙපාර්තමේන්තුව කියන්නෙ රජයේ ආයතනයක්. මේ දැරියට නීතිඥයෙකු දෙන්න පෝල්රාජ්ටවත් බැරිද?
මේ නිහඬකමට හේතුව ආණ්ඩුවෙ බලසම්පන්න අයෙක් මේක පිටිපස්සෙ ඉඳීම කියලා පැතිර යන කතාවෙ ඇත්තක් තියනවද?
ලැජ්ජයි!
සැකකාර හිමිනමටත් වරද ඔප්පු වෙනතුරු නිර්දෝෂීභාවයේ අයිතිය තිබෙනවා. විවාදයක් නෑ. ඒත් එයිට මෙහා මේ ආයතන, සමාජය සහ සංස්කෘතිය අතරෙ වැඩ කරන බල දේශපාලනයක් තිබෙන බව නොදන්න බබ්බු නෙවිනෙ කවුරුත්.
අවුරුදු 15ක තලා පෙළා දාපු අහිංසක දැරියක් ඉස්සරහ අවි අමෝරාගෙන ඉන්න මුළු සමාජයක් එක්කද තමුන් ඉන්නෙ, නැත්නම් යුක්තිය වෙනුවෙන්ද කියලා පපුවට තට්ටු කරලා අපි අපෙන් ම අහගනිමු!
සජිත් ඇතුළු විපක්ෂය කෝ මේකට කට ඇරියද? හැට හුටාමාරක් ලෝයර්ස්ලගෙ සංවිධාන කෝ ? ළමා සංවිධාන කෝ? එකම එක නීතිඥයෙක්වත් නැද්ද මේ රටේ ඒ දැරිය වෙනුවෙන් පෙනී ඉන්න?
~ සඳුන් ප්‍රියංකර විතානගේ
