මැයි 09 වනදා ගෝල්ෆේස් අරගල භූමියට එල්ල කළ ප්‍රහාරයට සම්බන්ධ අශාන්ත නාලක නොහොත් සතා නාලක නමැත්තා ඊයේ (21) දිනයේදී අපරාධ පරීක්ෂණ දෙපාර්තමේන්තුව විසින් අත් අඩංගුවට ගෙන තිබේ.
ගෝල්ෆේස් පිටිය අසලදී අරගලකරුවකුට යකඩ පොල්ලකින් මොහු පහරදෙන ආකාරය දැක්වෙන වීඩියෝව මාධ්‍ය සහ සමාජ මාධ්‍ය ඔස්සේ විකාශය වී තිබිණි.
මීට පෙර මාර්තු 31 වනදා ජනාධිපතිවරයාගේ මිරිහාන නිවස ඉදිරිපිට පැවති විරෝධතාව අසලට හමුදා බස් රථයක් පදවාගෙනවිත් මග හරස් කර නවත්වා තිබුණේ ද මොහු විසින් වන අතර පසුව එම බස් රථයට කිසිවෙකු විසින් ගිනිතබා තිබිණි.
එමෙන්ම පසුගිය 05 වනදා පාර්ලිමේන්තු පිවිසුම ඉදිරිපිට පැවති විරෝධතාව අසලදී ද මොහු අරගලකරුවට විරුද්ධව අදහස් ප්‍රකාශ කර තිබිණි.
43 හැවිරිදි මෙම පුද්ගලයා හෝකන්දර ප්‍රදේශයේ සැඟවී සිටියදී CIDය විසින් අත් අඩංගුවට ගෙන ඇති අතර ඔහු පාතාල කල්ලි සාමාජිකයකුගේ ඥාතියෙකු බවත් අනාවරණය වී ඇති බවයි පොලිසිය පවසන්නේ.
RN
