කොළඹ LNW:අප රටට ජාතික වන සංරක්ෂණ සහ වන ජීවි ප්‍රතිපත්තියක දැඩි අවශ්‍යතාවක් ඇති බව විපක්ෂ නායක සජිත් ප්‍රේමදාස පවසයි.
ඔහු සඳහන් කරන්නේ රටේ දැනට ඇත්තේ ඒ ඒ වෙලාවට නිර්මාණය වන ඛේදවාචකයන් හමුවේ තාවකාලික පැලැස්තර ලෙස නිර්මාණය වන පරිසර ප්‍රතිපත්තියක් බවයි.
විපක්ෂ නායක සජිත් ප්‍රේමදාස මහතා මේ බව කියා සිටියේ අද (13) Rain Forest Trust සංවිධානය විසින් වෘක්ෂලතාවල නාමපුවරු සවිකර ජනතාව දැනුවත් කර කොළඹ පාරිසරික සංරක්ෂණ කලාප නිර්මාණය කිරීමේ අරමුණින් නිදහස් චතුරස්‍ර පරිශ්‍රයේ ඇවිදින මංතීරුව අසළ පැවැති උත්සවය අමතමිනි
අද වන විට එල්නීනෝ ලානීනා කියන දේශගුණික කාලගුණික විපර්යාසය තුළ රටට මුහුණ දෙන්න ඇති භයංකාර තත්ත්වයක් ගැන කතා වෙන බවත් කෘෂිකාර්මික කටයුතු කඩා වැටී ජීවනෝපාය කඩා වැටි ජල හිගතාව නිසා පුනර්ජනනීය බලශක්තිය අහිමි වී ඛේදවාචක රැසක් සිදුවිය හැකි බවටත් අනතුරුදායක තත්ත්වයක් පවතින් බව හෙතෙම කියා සිටියි.
අද මේ ගැන විශාල ප්‍රවෘත්ති මැවුනත් පාර්ලිමේන්තුවේ තමා සහ මහාචාර්ය අබේවික්‍රම මහතා සම සභාපතීත්වය දරණ දේශගුණික විපර්යාස පිළිබඳ පාර්ලිමේන්තු සංසදයේ දී අනතුරු ඇගවු බවත් ඛේදවාචක සිදුවු පසු ප්‍රතිකර්ම සෙවීම සිදු කරනවාට වඩා මෙවැනි ඛේදවාචක සිදුවෙන්න පෙර සූදානම් විය යුතු බවත් විපක්ෂ නායකවරයා පවසයි.
ජනතාවගේ සෞඛ්‍ය සම්පන්න ජන ජීවිතය සුරක්ෂිත කරන්නට වනයේ නගරයේ හා ගමේ ඇති ස්වාභාවික වෘක්ෂලතා සුරක්ෂිත කළ යුතු අතර ආර්ථික ඉලක්ක අතර සාර්ව හා ක්ෂුද්‍ර ආර්ථික ඉලක්ක ගැන කතා කළත් අද වන විට GDP අංශයෙන් ඔබ්බට ගොස් Gross national happiness ගණනය කිරීමේ ක්‍රමයකට යා යුතු බව ඔහු ප්‍රකාශ කරයි.
එහි දි පරිසරය ගහකොළ සතාසිව්පාවගේ අගය වැඩි කිරීම ද සිදු කළ යුතු බවත් රටක් ලෙස ඉදිරිය ගැන සිතිය යුතු බවත් ප්‍රේමදාස මහතා වැඩිදුරටත් පවසයි.
