රෂිකා හෙන්නායක අගෝස්තු 13 , කොළඹ LNW :
ජපානයේ චිබා ප්‍රාන්තයේ නගරෙයාමා නගරයේ පදිංචිව සිටි 18 හැවිරිදි ශ්‍රී ලාංකික සිසුවෙකු, තම මිතුරෙකුට පිහියෙන් ඇන ඝාතනය කිරීමේ චෝදනාව මත අත්අඩංගුවට ගෙන ඇත.
මියගිය පුද්ගලයා 21 හැවිරිදි වියේ පසුවූ ශ්‍රී ලාංකිකයෙකු වන අතර, මොවුන් දෙදෙනාම ජපානයේ අධ්‍යාපනය ලබන ජාත්‍යන්තර සිසුන් බව වාර්තා වේ.
සැකකරු පවසන පරිදි, වින්දිතයා තමාට අපහාසාත්මක වචනවලින් බැන වැදී පහර දීම හේතුවෙන් ඇති වූ දැඩි කෝපය මත මෙම අපරාධය සිදු කර තිබේ.
සිද්ධියෙන් පසු සැකකරු විසින්ම හදිසි ඇමතුම් අංශ දැනුවත් කර ඇති අතර, තුවාල ලැබූ තරුණයා රෝහල්ගත කිරීමෙන් පසු මියගොස් ඇත.
දැනට පොලිස් භාරයේ පසුවන සැකකරු තම වැරැද්ද පිළිගෙන ඇති අතර ජපන් බලධාරීන් මේ පිළිබඳව වැඩිදුර විමර්ශන පවත්වයි.
මෙම කණගාටුදායක සිදුවීම විදේශයක ජීවත් වන එකම රටක පුද්ගලයන් දෙදෙනෙකු අතර ඇති වූ පුද්ගලික ආරවුලක දරුණු ප්‍රතිඵලයකි.
