සියයට සියයක් වැඩිහිටි පාර්ලිමේන්තුවකින් හෝ සියයට සියයක් තරුණ පාර්ලිමේන්තුවකින් හෝ අර්බුද විසඳිය නොහැකි බව මැතිවරණ කොමිසමේ හිටපු සභාපති මහින්ද දේශප්‍රිය මහතා පවසනවා. තරුණයන් සහ වැඩිහිටියන් අතර තිබෙන මෙම වෙනස ඉවත් කර තරුණ වැඩිහිටි මිශ්‍ර පාලනයක් බිහිකර ගැනීම රටේ අවශ්‍යතාවය බවයි ඔහු පෙන්වා දෙන්නේ.
වයස අවුරුදු 60 න් රාජ්‍ය සේවකයන් විශ්‍රාම යන ආකාරයෙන්ම දේශපාලනඥයන් සඳහාද විශ්‍රාම වයස් සීමාවක් හඳුන්වා දිය යුතු බවට විශාල ජනමතයක් නිර්මාණය වී ඇති බව පෙන්වා දෙන මහින්ද දේශප්‍රිය මහතා පවසන්නේ එසේ වුවහොත් රජයේ සේවෙයන් විශ්‍රාම යන රාජ්‍ය නිළධාරියෙකුට දේශපාලනයට පැමිණීමට ඇති අවස්ථාව අහිමි වන බවයි.
තරුණයන් අතට බලය නොලැබීමට බලපා ඇති ප්‍රධානතම සාධකය දේශපාලන පක්ෂ තුළ අභ්‍යන්තර ප්‍රජාතන්ත්‍රවාදය නොමැතිකම බවත් මෙතෙක් රට පාලනය කළ පක්ෂ මෙන්ම ප්‍රාදේශීය සභා මන්ත්‍රී ධුරයක් හෝ ලබාගෙන නොමැති පක්ෂ තුළද නායකයන් අසීමිත බලයක් භාවිතා කරමින් සිටින බවත් දේශප්‍රිය මහතා පවසනවා. එවැනි තත්වයක් තුළ තරුණයන්ගේ ප්‍රශ්න, කාන්තාවන්ගේ ප්‍රශ්න, සුළුතර කණ්ඩායම්වල ප්‍රශ්න කිසිවක් විසඳිය නොහැකි බවයි ඒ මහතා පෙන්වා දෙන්නේ.
මහින්ද දේශප්‍රිය මහතා මෙම අදහස් පළකළේ ප්‍රජාතන්ත්‍රවාදී දිනය නිමිත්තෙන් ඊයේ කොළඹදී පැවති සම්මන්ත්‍රණයකදී අදහස් දක්වමිනි.
UN
