රෂිකා හෙන්නායක සැප්තැම්බර් 19, කොළඹ LNW :
2026 වසරේ මාරක රිය අනතුරු 1,849ක් වාර්තා වී ඇත. තවද, අනතුරු බහුල ස්ථාන 712ක් හඳුනාගෙන ඇතැයි පොලිස්පති පවසයි. මෙහිදී දිවයින පුරා අනතුරු බහුල සහ අවදානම් සහිත ස්ථාන 712ක් හඳුනාගෙන ඇති බව නීතිඥ, පොලිස්පති ප්‍රියන්ත වීරසූරිය මහතා පවසයි.
නිතර රිය අනතුරු සිදුවන ස්ථාන හඳුනා ගැනීම සඳහා දිවයින පුරා සමීක්ෂණයක් සිදු කර ඇති අතර, රට පුරා අනතුරු බහුල ස්ථාන 712ක් හඳුනාගෙන ඇති බවත්, ඊට අදාළ දත්ත එක්රැස් කර බලධාරීන් වෙත ලබා දී ඇති බවත් ඔහු පැවසීය.
2026 වසරේ මේ දක්වා කාලය තුළ මාරක රිය අනතුරු 1,849ක් වාර්තා වී ඇති බවත්, එය පසුගිය වසරේ අදාළ කාලසීමාවට වඩා 8ක වැඩිවීමක් බවත් පොලිස්පතිවරයා සඳහන් කළේය.
පසුගිය වසරේ එම කාලසීමාවට සාපේක්ෂව මරණ සංඛ්‍යාව ද 16කින් ඉහළ ගොස් ඇති බව ඔහු වැඩිදුරටත් පැවසීය.
මාරක රිය අනතුරුවලින් වැඩිම බලපෑමට ලක්ව ඇත්තේ පදිකයින් සහ යතුරුපැදිකරුවන් වන අතර,
පදිකයින්ගේ මරණවලින් බොහෝමයක් සිදුව ඇත්තේ මාර්ගය අසල ඇවිද යමින් හෝ රැඳී සිටිමින් සිටි පුද්ගලයින් සම්බන්ධයෙන් බව ඔහු පෙන්වා දුන්නේය.
යතුරුපැදි ආශ්‍රිත මරණ සංඛ්‍යාව ඉහළ යාම පිළිබඳව ද අවධාරණය කළ පොලිස්පතිවරයා, එවැනි අනතුරු බොහෝ විට සිදුවන්නේ වෙනත් වාහන සමඟ ගැටීමෙන් නොව, ස්ථාවර හෝ මාර්ගය අසල ඇති වෙනත් බාධකවල ගැටීමෙන් බව සඳහන් කළේය.
