රෂිකා හෙන්නායක ඔක්තෝබර් 02, කොළඹ LNW :
ඉන්දියාවේ ප්‍රමුඛ පෙළේ අඩු වියදම් ගුවන් සේවයක් වන ‘IndiGo’ ආයතනය, ඉන්දියාව සහ ශ්‍රී ලංකාව අතර ප්‍රධාන ගුවන් මාර්ගවල දෛනික ගුවන් ගමන් යළි ආරම්භ කර ඇති අතර, එය අසල්වැසි රටවල් දෙක අතර ගුවන් සබඳතා ශක්තිමත් කිරීමටත්, සංචාරක, වෙළඳ සහ ව්‍යාපාරික ගමන් සඳහා සහය වීමටත් ඉමහත් පිටුවහලක් වනු ඇත.
ඔක්තෝබර් 1 වන දින සිට නවදිල්ලි-කොළඹ, බැංගලෝර්-කොළඹ සහ (ට්‍රිචි-යාපනය යන වැදගත් මාර්ග තුනක සේවාවන් එම සමාගම විසින් යළි ආරම්භ කරන ලදී.
නවදිල්ලි සහ කොළඹ මෙන්ම බැංගලෝර් සහ කොළඹ අතර දෛනික ගුවන් ගමන් යළි ආරම්භ කිරීමත් සමඟ, ඉන්දියාව සහ ශ්‍රී ලංකාව අතර සංචාරය කරන සංචාරකයින්ගේ, ව්‍යාපාරිකයන්ගේ සහ රාජ්‍ය තාන්ත්‍රික මගීන්ගේ ඉල්ලුම සපුරාලනු ඇතැයි අපේක්ෂා කෙරේ.
මේ අතර, මාස තුනක අත්හිටුවීමකින් පසු ඉන්දියාවේ තමිල්නාඩුවේ තිරුචිරප්පල්ලි ගුවන්තොටුපළ සහ යාපනය ජාත්‍යන්තර ගුවන්තොටුපළ අතර ‘IndiGo’ සෘජු ගුවන් සේවය ඔක්තෝබර් 1 වන දින යළි ආරම්භ විය.
මෙම ට්‍රිචි-යාපනය සේවය සතියේ දින තුනක එනම් අඟහරුවාදා, බ්‍රහස්පතින්දා සහ සෙනසුරාදා යන දිනවල ක්‍රියාත්මක වීමට නියමිතය.
එම දිනවල ගුවන් යානය දහවල් 1.05 ට ට්‍රිචි සිට පිටත්ව පස්වරු 1.50 ට යාපනයට ළඟා වනු ඇත. එය පස්වරු 2.30 ට යාපනයෙන් ට්‍රිචි බලා පිටත්ව යයි.
මෙම සේවාව යළි ආරම්භ කළ පළමු දිනයේදී මගීන් 88 දෙනෙක් ගුවන් ගමනට එක්වී සිටියහ.
උතුරු පළාතේ ජනතාව මෙම සෘජු ගුවන් සේවය යළි ආරම්භ කිරීම උණුසුම් ලෙස පිළිගෙන ඇත්තේ, උතුරු ශ්‍රී ලංකාව සහ තමිල්නාඩුව අතර ගමන් කරන පුද්ගලයින්ට එය වඩාත් වේගවත් හා පහසු ගමන් විකල්පයක් සපයන බැවිනි.
ට්‍රිචි-යාපනය මාර්ගය තමිල්නාඩුව සහ උතුරු පළාත අතර පවතින දිගුකාලීන සංස්කෘතික, පවුල් සහ වාණිජ සබඳතා තවදුරටත් පහසු කරනු ඇතැයි අපේක්ෂා කෙරේ.
රටවල් දෙක අතර අලුත් කරන ලද මෙම ගුවන් සබඳතා, ඉන්දියාව සහ ශ්‍රී ලංකාව අතර සංචාරක, වෙළඳ, ආර්ථික සහ සමාජීය සබඳතා තවදුරටත් වර්ධනය වීමට දායක වනු ඇතැයි අපේක්ෂා කෙරේ.
