සටහන – රුවන් නෙළුගොල්ල
මෙවර මහමැතිවරණයේදී මැතිවරණ දිස්ත්‍රික්ක 22 සඳහා කණ්ඩායම් 690ක් තරග කිරීමට නියමිත බව මැතිවරණ කොමසාරිස් ජනරාල් සමන් ශ්‍රී රත්නායක මහතා පවසයි.
නාමයෝජනා 74ක් ප්‍රතික්ෂේප වී ඇති බව පැවසූ ඒ මහතා යම් අසාධාරණයක් වී ඇතැයි හැඟේ නම් එම කණ්ඩායම් වලට අධිකරණයට යා හැකි බවත් සඳහන් කළේය.
2024 මහ මැතිවරණය සඳහා නාමයෝජනා භාරදීම ඊයේ (11) දහවල් 12.00න් අවසන් විය. නාමයෝජනා අනුමත වූ කණ්ඩායම්වල අපේක්ෂකයින් සඳහා මනාප අංක ලබාදීම ඉදිරියේදී සිදුකෙරෙන බවයි මැතිවරණ කොමසාරිස් ජනරාල්වරයා වැඩිදුරටත් සඳහන් කළේ.
“සමස්තයක් විදියට නාමයෝජනා පත්‍ර 764ක් ලැබී තිබුණා. මෙයින් නාමයෝජනා පත්‍ර 74ක් ප්‍රතික්ෂේප වෙලා තිබුණා. ඒ වගේම මේ ඉදිරි මැතිවරණයේදී මැතිවරණ දිස්ත්‍රික්ක 22 සඳහා තරග කරනවා කණ්ඩායම් 690ක්. මේ ඕනෙම ප්‍රතික්ෂේප වුණු නාමයෝජනාකරුවකුට පුළුවන් තමන්ගෙ නාමයෝජනා ප්‍රතික්ෂේප වීම සම්බන්ධව ගරු අධිකරණයට ගිහිල්ලා නියෝගයක් ලබාගැනීමට. ස්වාධීන කණ්ඩායම් සඳහා ඒ ඒ දිස්ත්‍රික්කයේ තේරීම්භාර නිලධාරියා විසින් ඔවුන්ට අදාළ සලකුණු ලබාදීමත් අද සිදුකරනු ලැබුවා. වැඩිම දේශපාලන පක්ෂ සහ ස්වාධීන කණ්ඩායම් ප්‍රමාණයක් තරග කරන්නේ දිගාමඩුල්ල මැතිවරණ දිස්ත්‍රික්කයට. 64ක ප්‍රමාණයක් ඉන්නවා එහි. ඒ වගේම අවමය පොලොන්නරුව සහ මොනරාගල දිස්ත්‍රික්ක දෙකේ. මේ දිස්ත්‍රික්ක දෙක සඳහා දේශපාලන පක්ෂ, ස්වාධීන කණ්ඩායම් 15 බැගින් තරග කරනු ලබනවා”
මැතිවරණ කොමසාරිස් ජනරාල් සමන් ශ්‍රී රත්නායක මහතා මේ බව පැවසුවේ ඊයේ (11) පස්වරුවේ පැවති මාධ්‍ය හමුවක් අමතමිනි.
