සටහන – රුවන් නෙළුගොල්ල
යුද්ධය අවසන් වී වසර 15ක් ගත වී ඇතත් උතුරු නැගෙනහිර පළාත්වල සංවර්ධන ගැන සෑහිමකට පත්විය නොහැකි බවත් මේ පළාත් දෙකේ සංවර්ධනය වෙනුවෙන් ජනාධිපති කාර්ය සාධන බලකායක් ස්ථාපිත කරන බවත් විපක්ෂ නායක සජිත් ප්‍රේමදාස මහතා පැවසීය.
මේ ජනාධිපති කාර්ය සාධක බලකාය හරහා ප්‍රාදේශීය ලේකම් කොට්ඨාස මට්ටමින් සංවර්ධන කටයුතු කරන බවත් විපක්ෂ නායකවරයා වැඩිදුරටත් පැවසීය.
විපක්ෂ නායක සජිත් ප්‍රේමදාස මහතා මේ බව පැවසුවේ සක්වල සුහුරු පන්ති කාමර ලබා දීමේ වැඩසටහනේ 322 වැනි අදියර යටතේ වන්නි, මුලතිව්, පුදුකුඩුඉරුප්පු ඉර්නපලෙයි රෝමානු කතෝලික මහා විද්‍යාලයට රුපියල් 1,177,000ක් සුහුරු පන්ති කාමර උපකරණ සහ ශබ්දකෝෂ රැසක් පරිත්‍යාග කිරීමේ අවස්ථාවට එක්වෙමිනි. මෙහි දී පාසලේ නර්තන කණ්ඩායමට ඇදුම් ලබා ගැනිමට පාසල් සංවර්ධන ගිණුමට රු. ලක්ෂයක මුදලක් ද ඒ මහතා පරිත්‍යාග කළේය.
අධ්‍යාපන ක්ෂේත්‍රයේ නව මගකට යොමුවිය යුතු බවත් තොරතුරු තාක්ෂණය සහ ඉංග්‍රීසි භාෂාව ඇතුළත් නව විෂය නිර්දේශයක් නිර්මාණය කළ යුතු බවත් විපක්ෂ නායකවරයා මෙහිදී පෙන්වා දුන්නේය.
සමගි ජන බලවේගය විසින් ක්‍රියාත්මක කරන හුස්ම වැඩසටහන යටතේ මේ වන විට රෝහල් 61කට රුපියල් ලක්ෂ 1837ක් වටිනා ඖෂධ සහ රෝහල් උපකරණ ලබාදී තිබේ. සක්වල බස් රථ වැඩසටහන යටතේ පාසල් 89ක් සඳහා රුපියල් ලක්ෂ 50ක් වටිනා බස් රථ 89ක් ලබා දී ඇති අතර ඒ සඳහා රුපියල් ලක්ෂ 4342ක් ද සක්වල තොරතුරු තාක්ෂණ වැඩසටහන යටතේ පාසල් 322ක් සඳහා සුහුරු පන්ති කාමර උපකරණ ලබා දී ඇති අතර ඒ සඳහා රුපියල් ලක්ෂ 3557ක් වැය කර තිබේ.
