කොළඹ LNW: පාස්කු ප්රහාරයේ සිදුවීමට අදාළව හිටපු ආරක්ෂක ලේකම් හේමසිරි ප්රනාන්දු සහ හිටපු පොලිස්පති පූජිත් ජයසුන්දර යන මහත්වරු එම චෝදනාවලින් නිදොස් කොට නිදහස් කිරීමට කොළඹ ත්රිපුද්ගල මහාධිකරණ විනිසුරු මඩුල්ලක් විසින් දුන් නියෝගයට එරෙහිව නීතිපතිවරයා විසින් ඉදිරිපත් කළ අභියාචනයක් විභාග කළ ශ්රේෂ්ඨාධිකරණය එම නඩුවට අදාළ විත්ති වාචකය කැඳවීමට පියවර ගන්නා ලෙස ත්රිපුද්ගල මහාධිකරණ විනිසුරු මඩුල්ල නියම කළේය.
පාස්කු ඉරුදින ත්රස්ත ප්රහාරයක් එල්ල වන බවට නිශ්චිත බුද්ධි තොරතුරු ලැබී තිබියදීත් එය වළක්වා ගැනීමට ක්රියාමාර්ග නොගැනීම තුළින් සාපරාධී ලෙස රාජකාරි පැහැර හැරීම,මිනීමැරුම ඇතුළු චෝදනා ඔවුන් දෙදෙනාට එල්ල වී තිබුණි.
අදාළ සිද්ධිය සම්බන්ධයෙන් හිටපු ආරක්ෂක ලේකම් හේමසිරි ප්රනාන්දු සහ හිටපු පොලිස්පති පූජිත් ජයසුන්දර යන මහත්වරුන්ට එරෙහිව නීතිපතිවරයා විසින් කොළඹ ත්රිපුද්ගල මහාධිකරණ විනිසුරු මඩුල්ලක් ඉදිරියේ නඩු පවරා තිබුණු අතර එම නඩු විභාග කළ ත්රිපුද්ගල මහාධිකරණ විනිසුරු මඩුල්ල විත්තියේ සාක්ෂි කැඳවීමකින් තොරව එම විත්තිකරුවන් දෙදෙනාම නිදොස් කොට නිදහස් කිරීමට තීන්දු කර කළේය..
අනතුරුව ත්රිපුද්ගල මහාධිකරණ විනිසුරු මඩුල්ලේ එම තීරණය නීතියට පටහැනි බවත් එය බලරහිත කරන ලෙසත් ඉල්ලා නීතිපතිවරයා විසින් එම අභියාචනා පෙත්සම් ශ්රේෂ්ඨාධිකරණයට ඉදිරිපත් කරන ලදී.
එම නඩු විභාගයෙන් අනතුරුව තීන්දුව ප්රකාශයට පත්කරමින් ශ්රේෂ්ඨාධිකරණ විනිසුරු මඩුල්ල සඳහන් කළේ එම නඩු විභාගයේදී මහාධිකරණය විසින් විත්තිවාචකය කැඳවීය යුතුව තිබූ බවයි.
ඒ අනුව උක්ත තීන්දු ප්රකාශයට පත්කරන බවත් විනිසුරුවරයා සඳහන් කළේය.
ආශිකා බ්රාහ්මණ
