පුවතේ Audio පිවිසුම වෙත;
පුවතේ Video පිවිසුම වෙත;
සටහන – පුලී
ජූනි 18, LNW (කොළඹ): ලොව ප්‍රකට පීසා අවන්හල් සන්නාමයක් වන Pizza Hut, එහි මව් සමාගම වන Yum! Brands විසින් ඇමෙරිකානු ඩොලර් බිලියන 2.7ක වටිනාකමකින් යුත් ගනුදෙනු දෙකක් යටතේ විකිණීමට එකඟ වී තිබේ.
සමාගම නිකුත් කළ නිවේදනයකට අනුව, Pizza Hut හි චීනයේ ප්‍රධාන භූමියේ ව්‍යාපාරික මෙහෙයුම් හැර අනෙකුත් සියලුම ව්‍යාපාරික කටයුතු පුද්ගලික ආයෝජන සමාගමක් වන LongRange Capital විසින් ඩොලර් බිලියන 1.5කට මිලදී ගනු ඇත.
මේ අතර, චීනයේ ප්‍රධාන භූමියේ Pizza Hut ව්‍යාපාරය Yum China Holdings සමාගම විසින් ඩොලර් බිලියන 1.2කට අත්පත් කර ගැනීමට නියමිතය.
අභියෝග රැසකට මුහුණ දුන් Pizza Hut!
පසුගිය වසර කිහිපය තුළ Pizza Hut සන්නාමය අඩුවන අලෙවිය, යාවත්කාලීන නොකළ අවන්හල්, සහ ක්ෂණික ආහාර වෙළෙඳපොළේ දැඩි තරඟකාරීත්වය හේතුවෙන් අභියෝග රැසකට මුහුණ දී තිබුණි.
මෙම වසරේ පෙබරවාරි මාසයේදී Yum! Brands සමාගම Pizza Hut සඳහා ඇති විකල්ප සලකා බලමින් සිටින බව ප්‍රකාශ කළ අතර, ඒ සමඟම එක්සත් ජනපදයේ අවන්හල් 250ක් පමණ වසා දැමීමේ සැලැස්මක් ද ඉදිරිපත් කර තිබුණි.
වෙළෙඳපොළ විශ්ලේෂකයන් පෙන්වා දෙන්නේ, පාරිභෝගික රුචි අරුචිකම් වෙනස් වීම සහ නව පීසා බෙදාහැරීමේ සේවා සමාගම්වල වර්ධනය Pizza Hut හි ව්‍යාපාරික කාර්ය සාධනයට බලපා ඇති බවයි.
දශක හයකට වැඩි ඉතිහාසයක්!
Pizza Hut ආරම්භ කර ඇත්තේ 1958 වසරේදී ඇමෙරිකා එක්සත් ජනපදයේ කැන්සාස් ප්‍රාන්තයේ විචිටා නගරයේදීය.
1977 වසරේදී PepsiCo සමාගම Pizza Hut අත්පත් කර ගත් අතර, 1997 වසරේදී එහි අවන්හල් ව්‍යාපාරය වෙන්කර Yum! Brands ලෙස ස්වාධීන සමාගමක් බවට පත් කළේය.
අද වන විට Pizza Hut ලොව රටවල් ගණනාවක ශාඛා දහස් ගණනක් පවත්වාගෙන යන ජාත්‍යන්තර ආහාර සන්නාමයක් ලෙස සැලකේ.
“අනාගත වර්ධනයට හොඳ පදනමක්”
මෙම ගනුදෙනුව පිළිබඳ අදහස් දක්වමින් Yum! Brands ප්‍රධාන විධායක නිලධාරී ක්‍රිස් ටර්නර් පැවසුවේ, LongRange Capital සහ Yum China යන සමාගම් දෙක යටතේ Pizza Hut සන්නාමය අනාගත වර්ධනය සඳහා වඩාත් ශක්තිමත් ස්ථානයක සිටිනු ඇති බවයි.
“අවන්හල් කර්මාන්තය පිළිබඳ ගැඹුරු දැනුමක් සහ අත්දැකීම් ඇති නව හිමිකරුවන් යටතේ Pizza Hut හි අනාගතය සාර්ථක වනු ඇතැයි අප විශ්වාස කරනවා,” යනුවෙන් ඔහු නිවේදනයක් නිකුත් කරමින් සඳහන් කළේය.
KFC සහ Taco Bell ඇතුළු ලොව ප්‍රකට ආහාර සන්නාම කිහිපයක් ද Yum! Brands සමාගම සතු වේ.
Pizza Hut විකිණීමේ තීරණය, සමාගමේ දිගුකාලීන ව්‍යාපාරික උපායමාර්ගික සමාලෝචනයක ප්‍රතිඵලයක් ලෙස සැලකෙන අතර, එය ලෝක ආහාර සේවා කර්මාන්තයේ මේ වසරේ සිදුවන විශාලතම ගනුදෙනු අතරින් එකක් වනු ඇතැයි අපේක්ෂා කෙරේ.
