සටහන – පුලී
ජූනි 25, LNW (කොළඹ): උතුරු ජපානයේ වෙරළට ඔබ්බෙන් බ්‍රහස්පතින්දා (අද) උදෑසන ප්‍රබල භූමිකම්පාවක් සිදුව ඇති අතර, එය රටේ ඊසානදිග ප්‍රදේශ රැසකට බලපෑ බව වාර්තා වේ. කෙසේ වෙතත්, ජපාන කාලගුණ විද්‍යා ඒජන්සිය සඳහන් කළේ මෙම භූමිකම්පාව හේතුවෙන් සුනාමි අවදානමක් නොමැති බවයි.
කාර්යාල සහ පාසල් වෙත ජනතාව ගමන් කරමින් සිටි කාර්යබහුල උදෑසනක මෙම කම්පනය සිදුව ඇති අතර, එහි බලපෑම ඊසානදිග ජපානයේ නගර සහ ගම්මාන දුසිම් ගණනක ජනතාවට දැනී තිබේ. ජපානයේ අගනුවර වන ටෝකියෝහි ද භූමිකම්පාවේ සුළු කම්පන දැනී ඇති බව සඳහන් වේ.
මෙම භූමිකම්පාව සිදුවූ ප්‍රදේශය මෑත මාස කිහිපය තුළ ද නිරන්තරයෙන් භූමිකම්පා වාර්තා වූ කලාපයකි. පසුගිය දෙසැම්බර් මාසයේදී එම ප්‍රදේශයේ සිදුවූ තවත් ප්‍රබල භූමිකම්පාවක් හේතුවෙන් සතියක කාලයක් සඳහා “මහා භූමිකම්පා අවදානම්” අනතුරු ඇඟවීමක් ද නිකුත් කර තිබුණි.
හෂිකාමි නගරයේ පාසල් විදුහල්පතිනියක පැවසුවේ, රැකියාවට යමින් සිටියදී තම මෝටර් රථය දෙපසට සෙලවුණු බවයි. එම අවස්ථාවේ පාසලේ රැස්ව සිටි දරුවන් ආරක්ෂිතව සිටි නමුත්, ඇතැම් දරුවන් භීතියට පත්ව කඳුළු සලමින් සිටි බව ද ඇය සඳහන් කළාය.
බලධාරීන් පවසන්නේ භූමිකම්පාවෙන් බරපතළ තුවාල හෝ විශාල දේපළ හානි මෙතෙක් වාර්තා වී නොමැති බවයි. එසේ වුවද, පසුකම්පන ඇතිවීමේ හැකියාව පිළිබඳව ජනතාව අවධානයෙන් සිටිය යුතු බවට නිලධාරීන් උපදෙස් ලබාදී ඇත.
