කොළඹ ඉන්දුනීසියානු සංස්කෘතික මධ්‍යස්ථානය විවෘත කෙරේ…

රෂිකා හෙන්නායක අගෝස්තු 13 , කොළඹ LNW :

ඉන්දුනීසියාව සහ ශ්‍රී ලංකාව අතර සංස්කෘතික හුවමාරුව සහ ජනතාව අතර සබඳතා ශක්තිමත් කිරීමේ ප්‍රයත්නයන්හි නව පියවරක් සනිටුහන් කරමින්, කොළඹ පිහිටි ඉන්දුනීසියානු ජනරජයේ තානාපති කාර්යාලය පසුගියදා ‘ඉන්දුනීසියානු සංස්කෘතික මධ්‍යස්ථානය’ (ICC) විවෘත කරන ලදී.

ශ්‍රී ලංකාවේ සහ මාලදිවයිනේ ඉන්දුනීසියානු තානාපතිනි ඩෙවි ගුස්ටිනා ටොබින්ග් (Dewi Gustina Tobing) මහත්මිය විසින් මෙම මධ්‍යස්ථානය නිල වශයෙන් විවෘත කරන ලද අතර, ශ්‍රී ලංකාවේ බුද්ධශාසන, ආගමික හා සංස්කෘතික කටයුතු අමාත්‍ය මහාචාර්ය හිනිදුම සුනිල් සෙනෙවි මහතා ප්‍රධාන ආරාධිත අමුත්තා ලෙස ඊට සහභාගී විය.

මෙම සමාරම්භක උත්සවය සඳහා තානාපතිවරුන්, රාජ්‍යතාන්ත්‍රික දූත මණ්ඩල නියෝජිතයින්, පාසල් ගුරුවරුන්, විශ්වවිද්‍යාල කථිකාචාර්යවරුන්, සිසුන්, කලාකරුවන් සහ සංස්කෘතික ක්ෂේත්‍රයේ නියැලෙන්නන් එක්ව සිටියහ.

ශ්‍රී ලාංකිකයින්ට ඉන්දුනීසියානු සංස්කෘතිය පිළිබඳව ඉගෙන ගැනීමට සහ එය අත්විඳීමට අවස්ථාව සලසන වේදිකාවක් ලෙස ස්ථාපිත කර ඇති මෙම මධ්‍යස්ථානය (ICC), ඉන්දුනීසියානු පොත්පත් සහ සංස්කෘතික ද්‍රව්‍ය සහිත පුස්තකාලයක්, ජාවානු ‘ගමෙලාන්’ (Gamelan) සහ ‘අන්ග්ක්ලුන්ග්’ (Angklung) වැනි සාම්ප්‍රදායික සංගීත භාණ්ඩ, ‘වයාන්ග් කුලිට්’ (Wayang Kulit) සහ ‘වයාන්ග් ගොලෙක්’ (Wayang Golek) රූකඩ, සාම්ප්‍රදායික නැටුම් පුහුණු ප්‍රදේශයක්, ඉන්දුනීසියානු භාෂාව ඉගෙනීමේ පහසුකම් සහ චිත්‍රපට ප්‍රදර්ශනය සඳහා වූ ස්ථානයකින් සමන්විත වේ.

කොළඹ පිහිටි ඉන්දුනීසියානු තානාපති කාර්යාලයෙන් පුහුණුව සහ මගපෙන්වීම ලැබූ ශ්‍රී ලාංකික සංගීතඥයින්ගෙන් සමන්විත ‘ගමෙලාන් සෙකාර් ලාරාස්’ (Gamelan Sekar Laras) නම් ජාවානු ගමෙලාන් සංගීත කණ්ඩායම විසින් ඉදිරිපත් කළ සංගීත ප්‍රසංගය මෙම උත්සවයේ විශේෂ අංගයක් විය. ජාවානු සාම්ප්‍රදායික සංගීතයට ආවේණික නාද රටා සහ තාලයන් විදහා දක්වමින් එම කණ්ඩායම ජනප්‍රිය ජාවානු නිර්මාණයක් වන “ලන්කරන් ගුගුර් ගුනුන්ග්” (Lancaran Gugur Gunung) ඉදිරිපත් කළේය.

උතුරු සුමාත්‍රා හි ‘බටක්’ (Batak) ප්‍රජාවට අයත් සාම්ප්‍රදායික නැටුමක් වන ‘ටාරි ටෝර් ටෝර්’ (Tari Tor Tor) ද මෙම සංස්කෘතික වැඩසටහනට ඇතුළත් විය. ඉන්දුනීසියාවේ පොහොසත් ප්‍රසංග කලා සම්ප්‍රදායන් ඉස්මතු කරමින් කළුතර ‘සංක සමුධි ප්‍රසංග කලා පදනමේ’ (Sanka Samudhi Performing Art Foundation) නර්තන ශිල්පීන් විසින් මෙම නර්තනය ඉදිරිපත් කරන ලදී.

වැඩසටහනට තවත් අගයක් එක් කරමින්, තානාපති කාර්යාලයේ කාර්ය මණ්ඩලය විසින් සාම්ප්‍රදායික බාලි දූපත් නැටුමක් වන ‘ටාරි ලෙගොං බපාං සබා’ (T ඉන්දුනීසියානු භාෂා පාඨමාලා, සාම්ප්‍රදායික ඉන්දුනීසියානු නැටුම් පන්ති සහ සාම්ප්‍රදායික ඉන්දුනීසියානු සංගීත භාණ්ඩ පිළිබඳ පන්ති ඇතුළු වැඩසටහන් රැසක් ශ්‍රී ලාංකික ජනතාව වෙනුවෙන් පිරිනැමීමට ICC ආයතනය අපේක්ෂා කරයි.

එමෙන්ම, ශ්‍රී ලාංකිකයන්ට ඉන්දුනීසියානු සංස්කෘතිය සමඟ සෘජුව සම්බන්ධ වීමට අවස්ථාව සලසමින්, වැඩමුළු, ප්‍රදර්ශන, සාම්ප්‍රදායික කලා ප්‍රසංග, චිත්‍රපට ප්‍රදර්ශන සහ වෙනත් සංස්කෘතික හුවමාරු වැඩසටහන් ද මෙම මධ්‍යස්ථානය විසින් සංවිධානය කරනු ඇත.

Share post:

spot_imgspot_img

Popular

More like this
Related

නව යුගයක විවෘත ලෝකයක් සොයා යන GTA VI

නව යුගයක විවෘත ලෝකයක් සොයා යන GTA VI

ඇමෙරිකානු සාම බලකායේ ස්වේච්ඡා සේවකයෝ 34ක් දිවයිනට!

රෂිකා හෙන්නායක නොවැම්බර් 18, කොළඹ LNW: ඉංග්‍රීසි භාෂා අධ්‍යාපනය ශක්තිමත්...

ඇමරිකාවේ තාක්ෂණික බිඳවැටීම: Leave the World Behind යථාර්ථයක් වෙනගමන් ද?

ඇමරිකාවේ තාක්ෂණික බිඳවැටීම: Leave the World Behind යතාර්ථයක් වෙනගමන් ද?