රෂිකා හෙන්නායක අගෝස්තු 20 , කොළඹ LNW :
ඩුබායි රාජ්‍යයේදී අත්අඩංගුවට ගෙන මෙරටට පිටුවහල් කරන ලද ප්‍රබල මත්ද්‍රව්‍ය ජාවාරම්කරුවෙකු වන ශිරාන් බාසික් සම්බන්ධයෙන් ක්‍රියාත්මක විමර්ශන වළට අදාළව, සැකකරු දැනට දින 90ක රැඳවුම් භාරයේ පසුවන අතර, ඔහු සතු සියලුම බැංකු ගිණුම් පරීක්ෂා කරන ලෙස අධිකරණය විසින් මහ බැංකුවේ මූල්‍ය බුද්ධි ඒකකයට නියෝග කර ඇත.
මොහු විසින් විපක්ෂ දේශපාලනඥයෙකුට ලබා දුන් බව කියන මුදල් පිළිබඳව මෙන්ම කොළඹ මුහුදු මාවතේ පිහිටි ඔහුට අයත් යැයි සැකකෙරෙන හෝටල් පහක් සම්බන්ධයෙන් ද පොලිසිය මේ වන විට කරුණු අනාවරණය කරගෙන තිබේ.
නීති විරෝධී වත්කම් විමර්ශන කොට්ඨාසය විසින් මොහුගේ දේපළ සහ ආදායම් මාර්ග පිළිබඳව විශේෂ විමර්ශනයක් අරඹා ඇති බව මෙහි වැඩිදුරටත් සඳහන් වේ.
මෙම පරීක්ෂණ මගින් ඔහුගේ සංවිධානාත්මක අපරාධ ජාලය සහ ඊට සම්බන්ධ ප්‍රබල පුද්ගලයින් පිළිබඳව තොරතුරු තහවුරු කර ගැනීමට බලධාරීන් අපේක්ෂා කරයි.
