සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) ඔක්තෝම්බර් මස 04: ලතින් ඇමරිකාවේ විශාලතම ආර්ථිකය හිමි බ්‍රසීලය අද(ඔක්තෝබර් 4) ජනාධිපතිවරණයට මුහුණ දේ.
මෙවර ජනාධිපතිවරණ සඳහා වත්මන් ජනාධිපති ලුයිස් ඉනාසියෝ ලූලා ද සිල්වා සහ හිටපු ජනධිපති ජෙයාර් බොල්සොනාරෝගේ පුත්‍රයා වන සෙනෙට් සභික ෆ්ලාවියෝ බොල්සොනාරෝ අතර තියුණු තරගයක් නිර්මාණය වී තිබේ. මත විමසුම්වලින් දෙදෙනා අතර පැහැදිලි ඉදිරියක් හඳුනාගත නොහැකි තරම් සමීප තරගයක් පෙන්වන බව වාර්තා වේ.
80 හැවිරිදි ලූලා තවත් වසර හතරක ධුර කාලයක් සඳහා තරග කරන අතර, 45 හැවිරිදි ෆ්ලාවියෝ බොල්සොනාරෝ සිය පියාගේ දේශපාලන උරුමය ඉදිරියට ගෙන යන වැඩපිළිවෙළක් සමඟ මැතිවරණයට ඉදිරිපත්ව සිටින අතර, ඔහු ඩොනල්ඩ් ට්‍රම්ප් සමඟ වඩාත් සමීප සබඳතා සඳහා සහාය පළ කර තිබේ.
මෙවර බ්‍රසීල මැතිවරණය රටේ අභ්‍යන්තර දේශපාලනයට පමණක් සීමා නොවන බව දේශපාලන විශ්ලේෂකයෝ පෙන්වා දෙති.
පසුගිය කාලයේ ලතින් ඇමරිකානු රටවල් කිහිපයක දක්ෂිණාංශික හෝ ට්‍රම්ප් හිතවාදී දේශපාලන බලවේග ශක්තිමත් වී ඇති අතර, බ්‍රසීලයේ ප්‍රතිඵලය එම කලාපීය දේශපාලන ප්‍රවණතාවට වැදගත් බලපෑමක් ඇති කළ හැකි බව විශ්ලේෂණවල සඳහන් වේ.
විශේෂයෙන්ම ඇමෙරිකා එක්සත් ජනපදය සමඟ සබඳතා, චීනය සමඟ වෙළෙඳ සබඳතා, BRICS සංවිධානය තුළ බ්‍රසීලයේ භූමිකාව සහ ලතින් ඇමරිකාවේ කලාපීය දේශපාලන ස්වාධීනත්වය මැතිවරණයෙන් පසුව අවධානයට ලක්විය හැකි ප්‍රධාන කරුණු ලෙස සැලකේ. බ්‍රසීලයේ විශාලතම වෙළෙඳ හවුල්කරුවන් අතර චීනය සහ ඇමෙරිකාව සිටින බැවින්, නව රජයට දෙරට සමඟ සබඳතා සමතුලිත කරගැනීම වැදගත් කරුණක් වනු ඇත.
හෙට පැවැත්වෙන්නේ ජනාධිපතිවරණයේ පළමු වටය වන අතර, කිසිදු අපේක්ෂකයෙකුට සියයට 50කට වැඩි ඡන්ද ප්‍රතිශතයක් ලබාගැනීමට නොහැකි වුවහොත්, දෙවැනි වටයේ ඡන්ද විමසීම ඔක්තෝබර් 25 දා පැවැත්වීමට නියමිතය.
ඒ අනුව, බ්‍රසීලයේ හෙට පැවැත්වෙන ඡන්ද විමසීම ජනාධිපතිවරයෙකු තෝරාගැනීමේ මැතිවරණයක් පමණක් නොව, බ්‍රසීලයේ අනාගත විදේශ ප්‍රතිපත්තිය සහ ලතින් ඇමරිකාවේ බල සමතුලිතතාවය පිළිබඳ වැදගත් පරීක්ෂණයක් ලෙසද අවධානයට ලක්ව තිබේ.
