අපරාධ පරීක්ෂණ දෙපාර්තමේන්තුවේ හිටපු අධ්යක්ෂ, ජ්යේෂ්ඨ පොලිස් අධිකාරී ශානි අබේසේකර මහතාගේ ආරක්ෂාව සඳහා අවශ්ය නිලධාරීන් යෙදවීමට පියවර ගන්නා බව නීතිපතිවරයා අද (05) අභියාචනාධිකරණයට දැනුම් දී තිබේ.
ඒ, තමන්ට ජීවිත තර්ජන ඇති බැවින් ප්රමාණවත් ආරක්ෂාවක් ලබාදෙන්නැයි නියෝගයක් නිකුත් කරන ලෙස ඉල්ලා ශානි අබේසේකර මහතා විසින් ගොනුකර තිබුණු පෙත්සම අද කැඳවූ අවස්ථාවේදී ය.
එහිදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් රොහාන්ත අබේසූරිය මහතා සඳහන් කළේ ශානි අබේසේකර මහතාගේ ආරක්ෂාව සඳහා ආයුධ සන්නද්ධ පොලිස් නිලධාරීන් දෙදෙනෙකු ලබාදීමටත් ඊට අමතරව ඒ මහතාගේ නිවසේ ආරක්ෂාව සඳහා එක් පොලිස් නිලධාරියෙකු ලබාදීමටත් කටයුතු කරන බවයි.
එසේම තමන් පදිංචි ස්ථානය වෙනස් කිරීමට ශානි අබේසේකර මහතා කැමැත්ත දක්වන්නේ නම් ඒ සඳහා වෙනත් ස්ථානයක් ලබාදීමටත් සූදානම් බවත් අතිරේක සොලිසිටර් ජනරාල්වරයා අභියාචනාධිකරණයට දන්වා සිටියේය.
RN
