වැලිකඩ පොලිසිය විසින් අත් අඩංගුවට ගෙන ප්‍රශ්න කරමින් සිටි කාන්තාවක් රෝගාතුරව මියයාමේ සිද්ධියට අදාළව එම පොලිස් ස්ථානයෙහි නිලධාරීන් 4 දෙනෙකුගේ වැඩතහනම් කර ඇති අතර තවත් තිදෙනෙකුට ස්ථාන මාරුවීම් ලබාදී ඇති බව වාර්තා වේ.
ඒ අනුව පොලිස් පරික්ෂවරයෙක්, සැරයන්වරුන් දෙදෙනෙක් සහ පොලිස් කොස්තාපල්වරයෙකුගේ වැඩතහනම් කර ඇති අතර තවත් පොලිස් කොස්තාපල්වරියන් දෙදෙනෙකු සහ පොලිස් කොස්තාපල්වරයෙක්ට ස්ථාන මාරු ලබාදී ඇති බව සඳහන්.
සුධර්මා නෙත්තිකුමාර නම් ප්‍රසිද්ධ ව්‍යාපාරික කාන්තාවගේ නිවසේ රන් මුදුවක් නැතිවීමේ සිද්ධියක් සම්බන්ධයෙන් සැකපිට එම නිවසේ කලින් සේවය කළ ආර්. රාජකුමාරි නමැති 41 හැවිරිදි කාන්තාව මෙසේ වැලිකඩ පොලිසිය විසින් අත් අඩංගුවට ගෙන තිබුණු අතර ප්‍රශ්න කිරීම් අතරතුර අසනීප වූ ඇයව රෝහල්ගත කරන විටත් මියගොස් සිටි බව වාර්තා වී තිබිණි.
පොලිසීයේ පහරදීම් හේතුවෙන් මෙම කාන්තාව මියගිය බවට ඇයගේ ඥාතීන් චෝදනා කරන අතර සිද්ධිය සම්බන්ධ විමර්ශන අපරාධ පරීක්ෂණ දෙපාර්තමේන්තුව වෙත භාරදී තිබේ.
මෙම සිද්ධිය සම්බන්ධයෙන් පොලිසිය අධිකරණයට කරුණු දක්වන අවස්ථාවේදී අනාවරණය වී තිබුණේ අදාළ කාන්තාව වැලිකඩ පොලිසියේ රඳවාගෙන සිට තිබුණත් ඇයගේ නම රඳවා තබාගැනීමේ නාමලේඛනයට ඇතුළත් කර නොමැති බවයි.
RN
