කොළඹ LNW:වාණිජ වාහන 67ක සහ එච්එස් කේත 299කට අයත් භාණ්ඩවලට පනවා ඇති ආනයන සීමා ලබන සතියේ ලිහිල් කිරීමට නියමිතයි.
මුදල් රාජ්‍ය අමාත්‍ය ෂෙහාන් සේමසිංහ මහතා අද (04) පාර්ලිමේන්තුවේ දී විශේෂ ප්‍රකාශයක් සිදුකරමින් මේ බව සඳහන් කරන ලදී.
කෙසේවෙතත් පෞද්ගලික වාහනවලට අදාළ එච්.එස් කේත 304ක ආනයන සීමා ලිහිල් කිරීමට රජය තවමත් තීරණය කර නොමැති බව ද රාජ්‍ය අමාත්‍යවරයා පැවසුවේය.
පැවති විදේශ විනිමය හිඟතාවය සහ අත්‍යාවශ සේවාවන් ජනතාවට සැපයීමට අවශ්‍ය නිසා රටට සිදුකරන ඇතැම් ආනයනය තාවකාලිකව තහනම් කිරීමට සිදු වූ බවත් සමහර දේවල් තහනමකට ලක්කිරීමක් සිදුකළ බවත් එහිදී සේමසිංහ මහතා ප්‍රකාශ කළේය.
එමඟින් විශේෂයෙන්ම රේගු දෙපාර්තමේන්තුවට බලපෑමක් ඇති වූ අතර විශේෂයෙන්ම සුළු හා මධ්‍ය පරිමාණ ව්‍යාපාරිකයන් ඇතුළු කුඩා ව්‍යාපාරිකයින් ඔවුන්ගේ ව්‍යාපාර සිදුකිරීමටද බලපෑමක් වූ බවයි ඔහු පැවසුවේ.
ඔවුන්ගේ ආර්ථික ක්‍රියාවලියට බලපෑම් වීම හේතුවෙන් ඔවුන් යම් නොසතුටක සිටි බවත් ඇතැමුන් අමනාප වූ බවත් රාජ්‍ය අමාත්‍යවරයා කියාසිටියේය.
“මේ වෙනකොට අපි ඉදිරි සතිය තුළදී විශේෂයෙන්ම මේ පුද්ගලික වාහනවලට අදාළව එච්එස් කේත 304කට අදාළ වන සීමාකිරීම් හැර අනෙකුත් සීමා කිරිම් ලිහිල් කරන්න බලාපොරොත්තු වෙනවා. එතනදී පුද්ගලික පරිභෝජනය සඳහා වන මේ වාහනවලට අදාළව එච්එස් කේත 304 හැර අනෙක් ඒවා නිදහස් කිරීමකට භාජනය වෙනවා. ඒ තුළ අනෙකුත් භාණ්ඩ සඳහා එච්එස් කේත 299කුත් ඒවගේම විශේෂයෙන්ම එච්එස් කේත 67ක් අදාළ වෙනවා වාණිජ වාහන සඳහා.” යනුවෙන් ඔහු වැඩිදුරටත් ප්‍රකාශ කළේය.
ASK
