කොළඹ LNW:අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ජ්‍යෙෂ්ඨ පොලිස් අධිකාරී ශානි අබේසේකර මහතාගේ හා මිහින්තලේ රජමහා විහාරස්ථානයේ නායක ස්වාමීන් වහන්සේගේ ජීවිත ආරක්ෂාව සම්බන්ධයෙන් බරපතල ගැටළුවක් මතුව තිබෙන බව විපක්ෂ නායක සජිත් ප්‍රේමදාස මහතා අද (09) පාර්ලිමේන්තු විවාදයට එක්වෙමින් පැවසුවේය.
ශානි අබේසේකර මහතාව වාහනයකින් හප්පා ඝාතනය කිරීමේ කුමන්ත්‍රණයක් සම්බන්ධ තොරතුරු අනාවරණය වී ඇති බව නීතිපති දෙපාර්තමේන්තුවේ නිලධරීන් විසින් පසුගිය දා අධිකරණයේ පැවැති නඩු කටයුත්තක දී ඉදිරිපත් කර ඇති බවත් මෙය බරපතල කරුණක් බවත් විපක්ෂ නායකයා අවධාරණය කළේය.
එතුමාගේ ජීවිතය ආරක්ෂා කිරිමට අදාළ විධිමත් ආරක්ෂාවක් ලබා දීම රජයේ වගකීම බැවින් එම ආරක්ෂාව තහවුරු කරන ලෙස ඉල්ලා සිටින බවයි ඔහු ඒ සම්බන්ධයෙන් වැඩිදුරටත් පැවසුවේ.
එමෙන්ම මිහින්තලා රජමහා විහාරාධිපති හිමියන්ටද ජීවිත තර්ජනයක් පැමිණ තිබෙන බව සජිත් ප්‍රේමදාස මහතා පැවසුවේය.
මිහින්තලේ රජමහා විහාරස්ථානයේ නායක ස්වාමීන් වහන්සේගේ ජීවිතයට තර්ජනයක් ඇතිව තිබෙන බවත් පසුගිය සති 3ක සිට හමුදාවේ යැයි කියා ගත් දෙදෙනෙක් එම පුදබිමේ සිටියදී සිවිල් ආරක්ෂක නිලධාරින්ට සහ පොලිසියට හසුවී ඇති බවත් මේ නිසා නායක ස්වාමීන් වහන්සේගේ ජීවිතයට තර්ජනයක් පවතින බවට උන්වහන්සේ විශ්වාස කරන බවත් හෙතෙම ප්‍රකාශ කළේය.
මේ නාදුනන පුද්ගලයන් සම්බන්ධයෙන් මිහින්තලා පුදබිමේ ආරක්ෂාව සහ වැඩකටයුතු සම්බන්ධයෙන් සිටින හමුදා, පොලිස් සහ සිවිල් ආරක්ෂක නිලධාරීන් කිසිවකුත් නොදන්නා අතර පසුව අනාවරණය වී ඇති ආකාරයට මේ පුද්ගලයන් දෙදෙනා නොච්චියාගම ප්‍රදේශයේ හමුදා කදවුරක ප්‍රධාන අණදෙන නිලධාරියාගේ උපදෙස් මත පැමිණ ඇති බවට ප්‍රේමදාස මහතා සඳහන් කරන ලදී.
පක්ෂ විපක්ෂ භේදයකින් තොරව නායක ස්වාමීන් වහන්සේගේ ජීවිතය සම්බන්ධ වගකීමක් ඇති බවත් උන් වහන්සේ පක්ෂ විපක්ෂ භේදයකින් තොරව රටේ සිදුවන වැරදි සම්බන්ධයෙන් විවේචන සිදු කළත් ඒවා දරා ගැනීම අපගේ යුතුකම බවත් එබැවින් මේ සම්බන්ධයෙන් රජයේ අවධානය යොමු කර පරීක්ෂණයක් පැවැත්විය යුතු බවත් විපක්ෂ නායකයා වැඩිදුරටත් ප්‍රකාශ කළේය.
ASK
