UN

ලෝක වෙළඳපොලේ ඉහළ ගිය බොරතෙල් මිල දැන් ක්‍රමයෙන් අඩුවෙමින් තිබෙන බව පොදුජන පෙරමුණේ මහ ලේකම්, පාර්ලිමේන්තු මන්ත්‍රී සාගර කාරියවසම් මහතා පවසනවා. බොරතෙල් මිල අඩුවීමේ වාසිය ජනතාව ලබාදෙන බවත්, ඒ අනුව ඉදිරියේදී ඉන්ධන මිල අඩුවනු ඇති බවත් මන්ත්‍රීවරයා සඳහන් කරයි.

මීරිගම ප්‍රදේශයේ ඉන්ධන පිරවුම්හලක ඉන්ධන ලබා ගැනීම සඳහා පෝලිමේ සිටි පුද්ගලයෙකු මරණයට පත්ව තිබෙනවා. අදාල පුද්ගලයා පිරවුම්හල තුළ ඇදවැටීමෙන් මෙම මරණය සිදුව ඇති බවයි වාර්තා වන්නේ.

ශ්‍රී ලංකාව මුහුණ දී සිටින ආර්ථික අර්බුදයෙන් ගොඩඒම සඳහා චීනයෙන් ඇමරිකානු ඩොලර් බිලියන 2.05 ක ණය මුදලක් ඉල්ලා තිබෙනවා. මෙරට චීන තානාපතිවරයා මේ බව ප්‍රකාශ කරයි.

ඉදිරි වසර 05 තුළදී සිය බොරතෙල් නිෂ්පාදනය සැළකිය යුතු ප්‍රමාණයකින් ඉහළ දැමීමට සෞදි අරාබියේ සෞදි ඇරැම්කේ රාජ්‍ය ඉන්ධන සමාගම තීරණය කර තිබෙනවා.

ජනාධිපතිගේ ප්‍රධානත්වයෙන් 23 වැනිදා පැවැත්වීමට සැළසුම් කර තිබෙන සර්ව පාක්ෂික සමුළුව වර්ජනය කිරීමට විපක්ෂයේ ප්‍රධාන කණ්ඩායම වන සමගි ජන බලවේගය තීරණය කර තිබෙනවා.