Tag: ඉන්ධන

ලබන බදාදා (29) දිනය වනවිට බස් ගාස්තු වැඩි කිරීමට සිදුවන බව ප්‍රවාහන සේවා රාජ්‍ය අමාත්‍ය දිළුම් අමුණුගම මහතා පවසයි.

“යම් බස් ගාස්තු සංශෝධනයකට අපට ලබන සතියේ යන්න වෙනවා. අපි යන්න පුළුවන් අවම සංශෝධනයකට යන්නෙ. ඒ සංශෝධනයට යන්නෙත් ඉන්ධන මිලේ පහළ වැටීමක් හෝ ආසනගත මගී සංඛ්‍යාවේ නීතියක් දාලා තියෙනවා කොවිඩ් නිසා, තාම ඒක අපට අයින් කරන්න අවසර ලැබිලා නෑ, ඒ නීතිය හෝ අයින් කරපු දවසට නැවතත් ගාස්තු අඩු කරන කොන්දේසිය මත පමණක් අපට ඉතාමත් සුළු වැඩිවීමක් බදාදා වෙනකොට ලබලා දෙන්න සිද්ධ වෙනවා. මේවා අපි කැමැත්තෙන් කරන දේවල් නෙවෙයි”

රාජ්‍ය අමාත්‍ය දිළුම් අමුණුගම මහතා මේ බව පැවසුවේ ඊයේ (26) මහනුවර, අංකුඹුර ප්‍රදේශයේ පැවති උත්සවයක් අමතමිනි.

RN

ශ්‍රී ලංකාවට ණය පදනම මත බොරතෙල් ලබාදීමට සිංගප්පූරුව එකඟතාව පළ කර ඇති බැවින් සපුගස්කන්ද තෙල් පිරිපහදුව වැසීමේ අවදානමක් නොමැති බව ලංකා ඛනිජතෙල් නීතිගත සංස්ථාවේ සභාපති සුමිත් විජේසිංහ මහතා පවසයි.

දින 180ක් තුළ ණය පියවීමේ එකඟතාව මත අදියර හයක් යටතේ සිංගප්පූරුවෙන් බොරතෙල් ලබාගැනීමට නියමිත බවයි ඒ මහතා සඳහන් කළේ.

එසේම එම බොරතෙල් තොග ජනවාරි මැද භාගය පමණ වනවිට මෙරටට ලැබෙනු ඇති නිසා සපුගස්කන්ද තෙල් පිරිපහදුවේ කටයුතු අඛණ්ඩව පවත්වාගෙන යෑමට හැකිවනු ඇති බවත් ඒ මහතා ප්‍රකාශ කළේය.

RN

මෙතෙක් කාලයක් ඛනිජ තෙල් සංස්ථාව පාලනය කළ දේශපාලන අප්පුහාමිලාගේ අදූරදර්ශී පාලනය හේතුවෙන් එය බංකොලොත් වී ඒ බරත් ජනතාව මතම වැටී ඇති බව මහජන අයිතීන් සුරැකීමේ පදනමේ සභාපති අසේල සම්පත් මහතා පවසයි.

බවුසරයේ රෝද කැරකෙන නට් එකක් ගානට එහි සේවකයින් සිටින හෙයින් ඔවුන්ගේ වැටුප් අතිකාල දීමනා සඳහා විශාල මුදලක් යන අතරතුර ආයතනය බංකොලොත් බව පවසමින් සිටින බවයි ඔහු සඳහන් කරන්නේ.

එහෙත් රටේ ජනතාව ඉන්ධන ලබාගත්තේ ණයට නොවන බවද ඔහු පවසයි.

එවැනි තත්ත්වයකත් ආයතනය බංකොලොත් වන්නේ එදා සිට එය පාලනය කළ දේශපාලන අප්පුහාමිලාගේ ක්‍රියාවන් නිසා බව අසේල සම්පත් මහතා අවධාරණය කර සිටියි.

පවතින තත්ත්වය අනුව ඉන්ධන මිල ඉහළ යාම හේතුවෙන් ආහාර ද්‍රව්‍යවල මිල ඉහළ යාම වැලැක්විය නොහැකි බවත් තවදුරටත් පාලන මිලක් පවත්වාගෙන යාමට නොහැකි නිසාත් ආපනශාලා තුළද පාලන මිල ඉවත්කර ගන්නා බවයි ඔහු ප්‍රකාශ කරන්නේ.

ASK 

ඉන්ධන මිල ඉහළ දැමීම හේතුවෙන් මගී ප්‍රවාහන ත්‍රීරෝද රථවල ගාස්තු ද වැඩිකිරීමට කටයුතු කරන බව ජාතික ඒකාබද්ධ ත්‍රීරෝද රථ රියදුරන්ගේ හා කර්මාන්තකරුවන්ගේ සමිතිය පවසයි.

ඒ අනුව, පළමු කිලෝ මීටරය සඳහා මෙතෙක් අය කළ රුපියල් 50ක ගාස්තුව රුපියල් 80 දක්වා ඉහළ නංවන බවයි එම සමිතියේ ලේකම් රෝහණ පෙරේරා මහතා සඳහන් කරන්නේ.

කෙසේවෙතත් දෙවැනි කිලෝ මීටරයේ සිට අය කෙරෙන රුපියල් 45ක ගාස්තුව ඉහළ නොදමන බවත් ඒ මහතා ප්‍රකාශ කළේය.

RN

වැඩි කළ ඉන්ධන මිලට සාපේක්ෂව බස් ගාස්තු ද ඉහළ නැංවිය යුතු බව පෞද්ගලික බස් රථ හිමියන්ගේ සංගම් පවසයි.

ඒ අනුව අවම බස් ගාස්තුව රුපියල් 25 ක් දක්වා වැඩි කළයුතු බවයි ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා සඳහන් කළේ.

එමෙන්ම බස් ගාස්තු 20% කින් ඉහළ නැංවිය යුතු බව සමස්ත ලංකා පෞද්ගලික බස් සමාගම් සම්මේලනයේ සභාපති අංජන ප්‍රියන්ජිත් මහතා ප්‍රකාශ කළේය.

RN

දැනට පවතින තත්වය අනුව නම් සපුගස්කන්ද තෙල් පිරිපහදුව යළිත් වසාදැමීමට සිදුවනු ඇති බව ඛනිජ තෙල් සංස්ථා වෘත්තීය සමිති නායකයකු වන ආනන්ද පාලිත මහතා පවසයි.

“ඉන්දියාවෙන් තෙල් ගන්න පුළුවන් වෙන විදියට – දැනට දන්න විදියට – ඩොලර් මිලියන 500ක ණයක් අනුමත වුණයි කියනවා, ඉන්දියාවෙන් පමණයි ගන්න වෙන්නෙ. දැනට අපට තියෙන්නෙ ඩොලර් මිලියන 500ක් ලැබෙයි කියන විශ්වාසය පමණයි. පැහැදිලි අර්බුදයක් දැන් රට තුළට ඇවිල්ලා. වගකීමෙන් කියනවා මේ ඩොලර් මිලියන 500 නම් තත්වේ, පිරිපහදුව වහන්න වෙනවා. ගෙනාපු තෙල් නැවට පස්සෙ මේ මොහොත වෙනතුරු තෙල් නැවක් නෑ. ඇමතිවරයා රුපියල්වලින් හොයනවා බොරතෙල් නැව්. අහන්න තියෙන්නෙ මොළේ විකල්ද, සිහිය විකල්ද කියලා විතරයි“

ආනන්ද පාලිත මහතා මේ බව පැවසුවේ ඊයේ (19) විපක්ෂ නායක කාර්යාලයේ පැවති මාධ්‍ය හමුවක් අමතමිනි.

RN