සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) ඔක්තෝම්බර් මස 03: ප්‍රංශය පුරා පැතිර යන ශිෂ්‍ය විරෝධතා තවදුරටත් උණුසුම් වෙමින් පවතින අතර, පාසල් වසා දැමීම්, ගිනි තැබීම් සහ පොලිසිය සමඟ ගැටුම් රැසක් වාර්තා වී තිබේ.
අධ්‍යාපනය සඳහා රජයෙන් ප්‍රමාණවත් ආයෝජනයක් නොකිරීම, පන්ති කාමරවල අධික සිසු සංඛ්‍යාව, ගුරු හිඟය, අබලන් පාසල් ගොඩනැගිලි සහ ගුරුවරුන්ගේ වැටුප් සම්බන්ධ ගැටලු ඇතුළු කරුණු මුල් කර ගනිමින් මෙම විරෝධතා ආරම්භ වී තිබේ.
ඔක්තෝබර් 2 වනදා වනවිට ප්‍රංශයේ උසස් පාසල් 3,700කින් අවම වශයෙන් 400ක් වසා දමා තිබූ අතර, පාසල් 560ක පමණ විරෝධතා හෝ බාධා කිරීම් වාර්තා වී තිබේ. විරෝධතා පැරිස් ප්‍රදේශයෙන් ආරම්භ වී පසුව රට පුරා පැතිර ගොස් ඇත.
ප්‍රංශ බලධාරීන්ට අනුව මේ වනවිට 2,000කට ආසන්න පිරිසක් අත්අඩංගුවට ගෙන ඇති අතර, ඔවුන්ගෙන් බහුතරය ළමුන් බව අධිකරණ අමාත්‍යවරයා සඳහන් කර තිබේ. විරෝධතා අතරතුර සිසුන් සහ පාසල් කාර්ය මණ්ඩල සාමාජිකයන් ඇතුළු පිරිසක් තුවාල ලබා ඇති අතර, පාසල් ගොඩනැගිලි කිහිපයකටද දැඩි හානි සිදුව තිබේ.
විරෝධතාකරුවන්ගේ ක්‍රියාකාරකම් අතර පාසල් පිවිසුම් අවහිර කිරීම සහ මාර්ගවල ගිනි තැබීම් දක්නට ලැබුණු අතර, ඇතැම් ස්ථානවල පොලිසිය සමඟ ගැටුම් ඇති වී තිබේ. ඒ අතර පොලිස් බලධාරීන්ගේ ක්‍රියාමාර්ග සම්බන්ධයෙන්ද ශිෂ්‍යයන් සහ මානව හිමිකම් සංවිධාන විවේචන ඉදිරිපත් කර ඇත.
ප්‍රංශ රජය සාමකාමී විරෝධතා පැවැත්වීමේ අයිතිය පිළිගන්නා අතරම, ප්‍රචණ්ඩ ක්‍රියා සහ දේපළ හානි දැඩි ලෙස හෙළා දැක තිබේ. අධ්‍යාපන බලධාරීන් ශිෂ්‍යයන්ගේ ගැටලු පිළිබඳ සාකච්ඡා කිරීමට ශිෂ්‍ය සංවිධාන සහ ගුරු සංගම් සමඟ සාකච්ඡා ආරම්භ කිරීමටද පියවර ගෙන ඇත.
