කොළඹ LNW:බෙල්ජියමේ බ්‍රසල්ස් නුවරදී පැවති “Political Parties Under Pressure – How to Strengthen the Resilience of Parties Against Malign Influence from Third Actors” යන තේමාව යටතේ පැවති ජාත්‍යන්තර වට මේස සාකච්ඡාව ඇමතීම සමඟි ජන බලවේගයේ පාර්ලිමේන්තු මන්ත්‍රී කාවින්ද ජයවර්ධන සිදුකර ඇත.
පසුගිය 29 වැනිදා පැවති එම වටමේස සාකච්ජාව කොන්රාඩ් ඇඩනවර් පදනම (KAS) සහ යුරෝපීය දේශපාලන පදනම් ජාලය (ENoP) එක්ව සංවිධානය කර තිබේ.
මෙම වැඩසටහනට යුරෝපීය දේශපාලන පදනම්වල නියෝජිතයින්, යුරෝපා සංගමයේ ආයතන හා විද්වත් සංවිධානවල විශේෂඥයින් මෙන්ම ලොව පුරා හවුල්කාර කලාපවල නියෝජිතයින් සහභාගී වූහ.
ආරම්භක සැසියේදී අදහස් දැක්වූ වෛද්‍ය ජයවර්ධන, කුඩා ප්‍රජාතන්ත්‍රවාදී රටවල දේශපාලන පක්ෂ මුහුණ දෙන අභියෝග පිළිබඳ ශ්‍රී ලාංකේය දෘෂ්ටිකෝණය ඉදිරිපත් කළේය. ඉන්දියන් සාගරයේ හදවතෙහි පිහිටීම ශ්‍රී ලංකාවට විශාල උපායමාර්ගික වැදගත්කමක් ලබා දෙන බවත්, රටේ පොහොසත් ජනවාර්ගික හා ආගමික විවිධත්වය එහි ප්‍රබලතම ශක්තියක් වන බවත් ඔහු පෙන්වා දුන්නේය. ප්‍රජාවන් අතර භේද ඇති කිරීමට උත්සාහ කරන්නන්ගෙන් එම විවිධත්වය ආරක්ෂා කළ යුතු බවද ඔහු සඳහන් කළේය.
දේශපාලන පක්ෂවල ඔරොත්තු දීමේ හැකියාව ශක්තිමත් කළ යුතු ප්‍රධාන ක්ෂේත්‍ර තුනක් ඔහු අවධාරණය කළේය:
• තනි නායකයින් මත යැපීම වෙනුවට ශක්තිමත් පක්ෂ ආයතන ගොඩනැගීම;
• සමාජ මාධ්‍ය සහ කෘත්‍රිම බුද්ධිය (AI) හරහා පැතිරෙන නොමඟ යවන සහ හැඟීම් අවුස්සන අන්තර්ගතයට මුහුණ දීම, විශේෂයෙන් කරුණු තහවුරු කිරීමේ හැකියාව තවමත් සීමිත සිංහල හා දෙමළ භාෂාවලින් පැතිරෙන අන්තර්ගතයට;
• මැතිවරණ කාලයේදී පමණක් නොව මැතිවරණ අතර කාලය පුරාම පක්ෂ මූල්‍යකරණයේ විනිවිදභාවය සහතික කිරීම.ශක්තිමත් පක්ෂ ආයතන, අභ්‍යන්තර ප්‍රජාතන්ත්‍රවාදය, පුහුණුව සහ තරුණ නායකත්වය සඳහා සහාය දෙන ලෙස පාර්ලිමේන්තු මන්ත්‍රී වෛද්‍ය ජයවර්ධන යුරෝපීය හවුල්කරුවන්ගෙන් ඉල්ලා සිටියේය. දේශීය භාෂාවලින් කරුණු තහවුරු කිරීමේ හා ඩිජිටල් සාක්ෂරතා හැකියාවන් ගොඩනැගීමට උදව් කරන ලෙසත්, ශ්‍රී ලංකාව වැනි රටවල් සමඟ සැබෑ ප්‍රජාතන්ත්‍රවාදී හවුල්කරුවන් ලෙස කටයුතු කරන ලෙසත් ඔහු ඉල්ලා සිටින ලදී.
සිය කතාව අවසන් කරමින් ඔහු මෙසේ පැවසීය: “අහිතකර බලපෑම් දේශසීමා නොතකයි. යුරෝපයේ ඔරොත්තු දෙන ප්‍රජාතන්ත්‍රවාද අපට අවශ්‍ය නම්, ඉන්දියන් සාගර කලාපයේද ඒවා ගොඩනැගීමට අප උදව් විය යුතුය.”
මෙම වට මේස සාකච්ඡාව චැතම් හවුස් නීතිය (Chatham House Rule) යටතේ පැවැත්විණි.
