මෑත කාලීනව ශ්‍රී ලංකාවේ බැඩිමින්ටන් ක්‍රීඩාව ජාත්‍යන්තර තලයෙන් යම් අවධානයකට ලක් කිරීමට සමත් වී සිටින විරේන් නෙත්තසිංහ ආසියානු ක්‍රීඩා උළෙල නියෝජනය කරන විරේන් නෙත්තසාංහ භූතානයේ ගුරුන් අනිස් සහ මොංගෝලියාවේ සුමියාසුරන් එන්ක්බාත් පරාජයට පත් කරමින් අවසාන 16 දෙනා අතරට පිවිසීමට සමත් වුනා.
භූතානය නියෝජනය කළ අනීස් හා තරගය විනාඩි 25 ක කාලයක් පැවති අතර ලකුණු 21 – 6 සහ 21 – 14 ක් ලෙස වට 2- 0 ක පහසු ජයක් වාර්තා කරන්නට විරේන් සමත් වුණා.මොංගොලියානු ක්‍රීඩක එන්ක්බාත් ද විරේන් ඉදිරියේ පරාජයට පත් වූයේ වට 2 – 0 ක් ලෙසයි.විනාඩි 27 ක් පුරා පැවති එම තරගය විරාන් ජයගත්තේ ලකුණු 21 – 8 සහ 21 – 16 ලෙසයි.
මිට දින කිහිපයකට පෙර ශ්‍රී ලංකාව බිහි කළ සුවිශේෂීම බැඩිමින්ටන් ක්‍රීඩකයා ලෙස සැළකෙන නිලූක කරුණාරත්න සිය සමුගැනීම ප්‍රකාශ කළ පසුව ඉදිරි අනාගතයේදී විරේන් අවධානයෙන් යුතුව බලා ගන්නේනම් ජාත්‍යන්තරය ජයග්‍රහණය කිරීම සඳහා මෙහෙයවිය හැකි ක්‍රිඩකයෙක් වන අතර වැඩි ජාත්‍යන්තර තරග අවස්ථා මෙන්ම ජාත්‍යන්තර මට්ටමේ පුහුණුවද අවශ්‍ය වෙනවා.නිලූකට ද එවැනි අවස්ථා ලැබීම ඉදිරියට ඒමට බලපෑවත් එය තවත් කාලයකට පෙර මෙන්ම අඛණ්ඩව ලැබුණේනම් වැදගත් තවත් ප්‍රතිපල අත් කර ගන්නට තිබුණා.
මේ තත්ත්වය සම්බන්ධයෙන් හැදෑරීමක් කර විරේන් දැන් සිටින තරුණ වයසේදීම එම දොරටු විවර කර දිය හැකිනම් වඩාත් හොඳ ප්‍රතිපල අපේක්ෂා කළ හැකියි.
විරේන් මේ වන විටලෝක ශ්‍රේණිගත කිරීම්වල 93 වන ස්ථානයේ පසු වෙනවා.
සටහන – නිශ්මං රණස
