සටහන – පුලී
ජූලි 26, LNW (කොළඹ): ඕස්ට්රේලියාවේ ප්රමුඛ ගෝලීය මූල්ය සේවා සමාගමක් වන Macquarie Group හි කළමනාකාර අධ්යක්ෂවරිය සහ ප්රධාන විධායක නිලධාරිනිය (CEO) ලෙස කටයුතු කරන ශ්රී ලාංකික සම්භවයක් සහිත ෂෙමාරා වික්රමනායක 2026 නොවැම්බර් 6 වැනිදා සිට විශ්රාම ගැනීමට නියමිත බව එම සමාගම නිවේදනය කර තිබේ.
අවුරුදු 64ක් වයසැති වික්රමනායක, දශක හතරකට ආසන්න කාලයක් Macquarie Group සමඟ ගත කළ වෘත්තීය ජීවිතයට මෙසේ සමුදෙන අතර, එදින සිට Macquarie Group Limited සහ Macquarie Bank Limited හි අධ්යක්ෂ මණ්ඩලවලින්ද ඉවත් වනු ඇත.
ඇයගේ අනුප්රාප්තිකයා ලෙස දැනට Banking and Financial Services අංශයේ ප්රධානියා වන ග්රෙග් වෝඩ් තෝරාගෙන ඇති අතර, ඒ සඳහා අවශ්ය නියාමන අනුමැතිය හිමිවිය යුතු බව සමාගම සඳහන් කරයි.
ශ්රී ලාංකික පවුල් සම්භවයක් ඇති ෂෙමාරා වික්රමනායක 2018 වසරේ අගභාගයේදී Macquarie Group හි ප්රධාන විධායක නිලධාරිනිය ලෙස පත්වූ අතර, එම සමාගමේ ප්රථම කාන්තා CEO ලෙස ඉතිහාසයට එක්විය.
1987 වසරේ සිඩ්නි නගරයේදී Macquarie සමඟ එක්වූ ඇය, රටවල් හයක් පුරා විවිධ ව්යාපාරික අංශවල සේවය කරමින් කැපී පෙනෙන නායකත්වයක් ලබා දී තිබේ. ප්රධාන විධායක ධුරයට පත්වීමට පෙර වසර 10ක කාලයක් Macquarie Asset Management හි ප්රධානියා ලෙස කටයුතු කළ ඇය, එම ව්යාපාරය ගෝලීය යටිතල පහසුකම් සහ සැබෑ වත්කම් කළමනාකරණයේ ප්රමුඛ ආයතනයක් බවට පත් කිරීමට දායක වූවාය.
මේ අතර, ඇයගේ විශ්රාම ගැනීමත් සමඟ Macquarie සමාගමේ ඇය සතු සැලකිය යුතු කොටස් හිමිකාරීත්වය පිළිබඳවද ජාත්යන්තර ව්යාපාරික ක්ෂේත්රයේ අවධානය යොමුව තිබේ.
