ජාත්‍යන්තර මූල්‍ය අරමුදල විසින් එළඹෙන සතියේදී ශ්‍රී ලංකාව සම්බන්ධයෙන් නිකුත් කරන වාර්තාව ගැන පාර්ලිමේන්තු විවාදයක් පැවැත්වීම අවශ්‍ය බව එක්සත් ජාතික පක්ෂයේ නායක පාර්ලිමේන්තු මන්ත්‍රී රනිල් වික්‍රමසිංහ මහතා පවසයි.
මාධ්‍ය වෙත ප්‍රකාශයක් නිකුත් කරමින් වික්‍රමසිංහ මහතා මේ බව අවධාරණය කර තිබේ.
එම විවාදය පක්ෂග්‍රාහී විය යුතු නැති අතර වාර්තාවේ යෝජනා කර තිබෙන දේ ගැන සාකච්ජා කළ යුතුව ඇති බවත් ඒ මඟින් මූලික ප්‍රතිපත්ති ගැන පොදු එකඟතාවකට පැමිණීමට උත්සහ කළ යුතු බවයි වික්‍රමසිංහ මහතා කියාසිටින්නේ.
එවැනි එකඟතාවකට පැමිණිය යුතු අතර රටේ එකම සම්පත වන්නේ තරුණ පරපුර වෙනුවෙන් එය කළ යුතුව ඇති බව හෙතෙම සඳහන් කරයි.
එමෙන්ම තවදුරටත් ආර්ථිකය පිරිහෙමින් තිබෙන අතර ඩොලර් හිඟය ද විසඳා නොමැති බවයි ඔහු පෙන්වා දෙන්නේ.
මේ වන විට ඩොලර් වටිනාකම රු. 250ට පැමිණ තිබෙන අතර එය 275ක් දක්වා ඉහළ යන අතර එම සීමාවෙන් නතර කර නොගත හොත් වසර අවසාන වීමට පෙර 300 සීමාවටම යන බවද වික්‍රමසිංහ මහතා ප්‍රකාශ කරයි.
”දිළිඳු ජනගහනය ලක්ෂ 05කින් වැඩිවෙලා තියෙනවා. මධ්‍යම පන්තිය කඩා වැටිලා අමාරුවෙන් ජීවත් වෙන්නේ. ජුනි,ජුලි වෙද්දී නැවත ණය ගෙවන්න තියෙනවා. මේ වසර තුළ ඩොලර් බිලියන 06ක් ණය ගෙවන්න වෙලා තියෙනවා.” යනුවෙන්ද වික්‍රමසිංහ මහතා සඳහන් කරයි.
ASK
