සටහන – රෂිකා හෙන්නායක
කොළඹ (LNW): මාතර නගරයේ ගංවතුර වැළැක්වීම සඳහා ‘නිල්වලා’ ව්‍යාපෘතිය යටතේ මාතර අත්තුඩාව ප්‍රදේශයේ ඉදිකරන ලද ගල් බැම්ම අයහපත් කාලගුණික තත්ත්වය හේතුවෙන් කැඩී යාමේ අවදානමක් මතුව තිබේ.
එම නිසා ශ්‍රී ලංකා යුද හමුදාවේ 61 වැනි බලසේනාවේ සෙබළුන් 100කට අධික පිරිසකගේ සහභාගිත්වයෙන් ඔක්තෝබර් 06 රාත්‍රියේ සිට 07 වනදා අලුයම දක්වා එම බැම්ම ශක්තිමත් ලෙස සකස් කිරීම සඳහා අඛණ්ඩ මෙහෙයුමක් දියත් කරන ලදී.
මාතර දිස්ත්‍රික්කයේ මාලිම්බඩ, අකුරැස්ස, කඹුරුපිටිය, තිහගොඩ, අත්තුඩුව, මාතර කොටුව සහ ගල් බැම්ම යන ප්‍රදේශවල පවුල් 2500කට අධික සංඛ්‍යාවක් මේ වන විට අවතැන්ව සිටින අතර, ඔවුන්ට කඩිනම් සහන සැලසීමට ශ්‍රී ලංකා යුද හමුදාව, නාවික හමුදාව සහ ආපදා සහන කණ්ඩායම් ක්‍රියා කරයි.
හමුදාපතිවරයාගේ අධීක්ෂණය යටතේ, ශ්‍රී ලංකා යුද හමුදාව විසින් , ආපදා සහන ක්‍රියාවලියේ ප්‍රධාන අභියෝගය වූ අවතැන් වූ ජනතාවට ආහාර සහ ජලය සැපයීම සඳහා මාලිම්බඩ, අකුරැස්ස, තිහගොඩ සහ මාතර කොටුවේ ආහාර සැකසුම් මධ්‍යස්ථාන හතරක් ස්ථාපිත කර ඇත.
ගංවතුර ඇති ප්‍රදේශවල ජනතාවට ආහාර පාන බෙදා හැරීමට ත්‍රිවිධ හමුදා වාහන යොදා ගන්නා අතර , කළුතර දිස්ත්‍රික්කයේ ආපදා සහන මෙහෙයුම් සඳහා අතිරේක 58 සේනාංකය සහ ගැමුණු මුර යන්ත්‍ර සුදානම් කර ඇති අතර ශ්‍රී ලංකා යුධ හමුදාවට අයත් WMZ වාහන 3ක් සහ මෝටර් බෝට්ටු 6ක් අවශ්‍ය විටෙක යෙදවීමට සූදානම් කර ඇත.
එමෙන්ම ශ්‍රී ලංකා යුද හමුදා විශේෂ බළකායේ කිමිදුම් කණ්ඩායම් සහ කමාන්ඩෝ භට පිරිස් කෙටි දැනුම්දීමකින් ආපදා කටයුතු සඳහා කැඳවීමට ද කටයුතු යොදා ඇත.
කළු, නිල්වලා සහ ගිං වැනි ගංගා ඇතුළු දකුණු පළාතේ අනෙකුත් ගංගා ආශ්‍රිතව පදිංචිකරුවන්ට හදිසි ගංවතුර හෝ ගංවතුර තත්ත්වයන් පිළිබඳව අවධානයෙන් සිටින ලෙස දැනුම් දී ඇත.
ශ්‍රී ලංකා යුද හමුදාවේ 61 වැනි බලසේනාවේ නායකත්වය යටතේ, දකුණු පළාතේ ප්‍රාදේශීය ලේකම් කොට්ඨාශ සහ අනෙකුත් වගකිව යුතු රාජ්‍ය ආයතන සමඟ එක්ව ආපදා සහන මෙහෙයුම් දියත් කරන අතර අවශ්‍ය නම් 58 වැනි බලසේනාවේ සෙබළුන්ද සූදානම් කර ඇත.
එමෙන්ම අවශ්‍ය වූ විට යෙදවීම සඳහා නාවික හමුදා සහ බෝට්ටු මෙන්ම ගුවන් හමුදා භට පිරිස් ද යෙදවීමට සූදානම් කර ඇත.
ජනාධිපති රනිල් වික්‍රමසිංහ මහතා , ජාතික ආරක්‍ෂාව පිළිබඳ ජනාධිපති උපදේශක සාගල රත්නායක මහතා , ආරක්‍ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන් මහතා , ජනාධිපති ලේකම් සමන් ඒකනායක මහතා, ආරක්‍ෂක ලේකම් ජනරාල් කමල් ගුණරත්න මහතා, ආරක්‍ෂක මාණ්ඩලික ප්‍රධානී ජෙනරාල් ශවේන්ද්‍ර සිල්වා මහතා ඇතුළු පිරිස, හමුදාපතිවරුන්ට සහ පළාත් පාලන ආයතන ප්‍රධානීන්ට අවශ්‍ය උපදෙස් ලබාදෙනු ඇති.
තවද , ඔවුන්ගේ පූර්ණ අධීක්ෂණය යටතේ මෙම සහන සැළසුම් කටයුතු සිදුවෙමින් පවතී.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
