විමල් වීරවංශ මහතා සහ උදය ගම්මන්පිල මහතා අමාත්‍ය ධුරවලින් ඉවත් කිරීම සම්බන්ධයෙන් විරෝධය පළ කරමින් ජලසම්පාදන අමාත්‍ය වාසුදේව නානායක්කාර මහතා ද සිය අමාත්‍ය ධුරයෙන් ඉල්ලා අස්වීමට සූදානමින් සිටින බව තහවුරු නොකළ ආරංචිමාර්ග පවසයි.
ආණ්ඩුවේ කුඩා පක්ෂ 11ක් විසින් පෙරේදා පැවැත්වූ “මුළු රටම හරි මගට” සමුළුවේ මූලිකත්වය දැරූ කැබිනට් අමාත්‍යවරුන් තිදෙනා අතරින් ඉවත් කර නැත්තේ වාසුදේව නානායක්කාර මහතා පමණි. එමෙන්ම වාසුදේව මහතා විමල් හා ගම්මන්පිල සමග යුගදනවි ගිවිසුමට එරෙහිව ශ්‍රේෂ්ඨාධිකරණයට පෙත්සම් ඉදිරිපත් කළ අමාත්‍යවරයෙකු ද වෙයි.
මේ අතර ඉහත කී සිදුවීමටම අදාළව තමන් ද අමාත්‍ය ධුර අත්හැරිය යුතු බවට යෝජනාවක් ශ්‍රී ලංකා නිදහස් පක්ෂය තුළින් ඉදිරිපත්ව ඇතත් ඊට එකඟතාවක් හිමිව නොමැති බවත් ආරංචිමාර්ග ප්‍රකාශ කළේය. විශේෂයෙන් කම්කරු අමාත්‍ය නිමල් සිරිපාල ද සිල්වා මහතා මීට දැඩි විරෝධය පළ කර ඇති බව සඳහන්.
කෙසේවෙතත් ආණ්ඩුවේ කුඩා පක්ෂ 11 නායකයින් අද (04) දිනයේදී විශේෂ සාකච්ඡාවක් පවත්වා ඉදිරි ක්‍රියාමාර්ග පිළිබඳ තීරණයක් ගැනීමට නියමිත බව උදය ගම්මන්පිල මහතා මාධ්‍ය වෙත ප්‍රකාශ කර තිබිණි.
RN
