සටහන – රෂිකා හෙන්නායක
කොළඹ (LNW): ඊයේ රැස්වූ ශ්රි ලංකා මහ බැංකුවේ මුදල් මණ්ඩලය විසින්, සිය මුදල් ප්රතිපත්ති ස්ථාවරය ලිහිල් කිරීමට තීරණය කර ඇත .
ඒ අනුව මහ බැංකුවේ නිත්ය තැන්පතු පහසුකම් අනුපාතිකය 13% ක් සහ නිත්ය ණය පහසුකම් අනුපාතිකය 14% ක් දක්වා අඩු කිරීමට තීරණය කර ඇති අතර බලාපොරොත්තු වූවාට වඩා වේගයෙන් උද්ධමනය අඩුවීම සැලකිල්ලට ගනිමින් ශ්රී ලංකා මහ බැංකුවේ මුදල් මණ්ඩලය විසින් මෙම තීරණය ගෙන ඇති බව මහබැංකුව නිකුත් කල නිවේදනයේ සඳහන් වෙයි.
මැයි මාසය අවසන් වනවිට මෙරට විදෙස් සංචිත ප්රමාණය ද අමෙරිකානු ඩොලර් බිලියන 3 ඉක්මවා ඇති බව මහ බැංකුව පවසන අතර , පසුගිය අප්රේල් මාසය තුළ විදේශ සේවා නියුක්තිකයින්ගේ ප්රේශන ද සැලකිය යුතු ලෙස ඉහළ ගොස් තිබේ.
තවද, ශ්රී ලංකා මහ බැංකුව සදහන් කළේ අප්රේල් මාසය තුළ අමෙරිකානු ඩොලර් මිලියන 454ක ප්රේශන ලැබී ඇති බවයි.
පසුගිය මාර්තු මාසයට සාපේක්ෂව අප්රේල් මාසය තුළ සංචාරක පැමිණීම යම් පහළ මට්ටමක පැවතිය ද 2022 වර්ෂයේ අප්රේල් මාසයට සාපේක්ෂව සංචාරක පැමිණීම ඉහළ ගොස් ඇති අතර මහ බැංකුව සඳහන් කළේ මේ වසරේ ජනවාරි සිට අප්රේල් මාසය දක්වා වු කාලය තුළ සංචාරක ඉපැයීම් අමෙරිකානු ඩොලර් මිලියන 591ක් ලෙස වාර්තා වි ඇති බවය.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??