ලංකා ඛනිජ තෙල් සංස්ථාවේ සහ විදුලිබල මණ්ඩලයේ වෘත්තීය සමිති සමග ඇති සාමුහික ගිවිසුමෙන් ඉවත් වීමට විදුලිබල හා බලශක්ති අමාත්‍ය කංචන විජේසේකර මහතා අමාත්‍ය ලේකම්වරයාට උපදෙස් ලබාදී තිබේ.
ඒ අනුව එම ආයතන දෙකෙහි සේවකයින්ට වසර තුනෙන් තුනට ලැබෙන 25%ක වැටුප් වැඩිවීම්, වාර්ෂික බෝනස් ඇතුළු දීමනා සහ වරප්‍රසාද මින් ඉදිරියට ක්‍රියාත්මක නොවනු ඇති බවයි අමාත්‍යවරයා සඳහන් කරන්නේ.
RN
ලංකාවේ කඩා වැටුණු ආර්ථිකය ශක්තිමත් කිරීම සඳහා ජනාධිපති රනිල් වික්‍රමසිංහ මහතා ගෙන යන වැඩපිළිවෙළ සම්බන්ධයෙන් ජාත්‍යන්තර මූල්‍ය අරමුදලේ නියෝජිතයන් ප්‍රසාදය පළකර ඇති බවත් ඉදිරියේදී ජාත්‍යන්තර මූල්‍ය අරමුදලේ පළමු වාරිකය නිදහස් කිරීම සම්බන්ධයෙන් යහපත් ප්‍රතිචාර ලැබෙනු ඇති බවත් ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක මහතා පැවසීය.
සාගල රත්නායක මහතා මෙම අදහස් පළ කළේ, වෘත්තිය සමිති නියෝජිතයන් සමඟ ජනාධිපති කාර්යාලයේ දී පසුගියදා පැවති සාකච්ඡාවට එක්වෙමිනි .
උපයන විට අයකරනු ලබන බද්ද ඉවත් කර ගැනීම පිළිබඳ මාර්තු 08 හා 09 දිනවල ක්‍රියාත්මක කිරීමට නියමිත වෘත්තීය සමිති ක්‍රියා මාර්ග සම්බන්ධයෙන් මෙහිදී සාකච්ඡාවට ලක් කෙරිණි.
ආර්ථිකමය වශයෙන් රට පත්ව ඇති තත්ත්වය තේරුම් ගෙන අත්‍යාවශ්‍ය සේවාවන් හා අනෙකුත් සේවාවන් නිසි පරිදි ක්‍රියාත්මක කිරීමට සහාය ලබාදෙන ලෙස සාගල රත්නායක මහතා මෙහිදී වෘත්තීය සමිති නියෝජිතයන්ගෙන් ඉල්ලා සිටියේ ය.
බදු පැනවීම නිසා වෘත්තිකයන් පත්ව ඇති අපහසුතාව රජය තේරුම් ගෙන ඇති බවත් ඒ සම්බන්ධයෙන් අධ්‍යයනය කර අවශ්‍ය සංශෝධන ඉදිරියේ දී ගෙන ඒමට කටයුතු කරන බවත් රත්නායක මහතා පැවසීය.එම නිසා වෘත්තීය සමිති නායකයින් ලෙස රට අස්ථාවර කරන කිසිදු උත්සාහයකට සම්බන්ධ නොවන ලෙස ඉල්ලා සිටි සාගල රත්නායක මහතා එසේ වුවහොත් රටේ ආර්ථිකයට විශාල බලපෑමක් සිදුවනු ඇති බව ද සඳහන් කළේය.
තම මාසික ආදායම මත අයකරනු ලබන බදු ප්‍රතිශතය නිසා එදිනෙදා වියදම් සහ ගෙවිය යුතු බැංකු ණය වාරික කළමනාකරණය කර ගත නොහැකි බවත්, වැඩිවන විදුලි බිල්පත නිසා එය තවත් උග්‍ර වී ඇති බවත් වෘත්තීය සමිති නායකයින් මෙහිදී පෙන්වා දුන් අතර උපයන විට බදු අය කිරීමේ ප්‍රතිශතය සංශෝධනය කරන ලෙස ද ඔවුහු රජයෙන් ඉල්ලා සිටියහ.
එමෙන්ම රජයේ බදු දැලට හසු නොවූ පිරිස් තවමත් සිටින බැවින් ඔවුන්ව සොයා බදු දැලට හසු කර ගැනීමේ වැඩපිළිවෙළක් ක්‍රියාත්මක කරන්නේ නම් රජයට විශාල බදු ආදායමක් ලබා ගත හැකි බව ද වෘත්තිය සමිති නායකයෝ පෙන්වා දුන්හ.
විදුලිබල හා බලශක්ති අමාත්‍ය කාංචන විජේසේකර, රාජ්‍ය අමාත්‍ය ඩී. වී. චානක, ජනාධිපති ලේකම් සමන් ඒකනායක,ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්. එච්.එස්. සමරතුංග, ජනාධිපති වෘත්තීය සමිති අධ්‍යක්ෂ ජනරාල් සමන් රත්නප්‍රිය, ලංකා ඛනිජ තෙල් සංස්ථාව සභාපති මොහොමඩ් උවයිස්, ලංකා බැංකුවේ සභාපති ජනාධිපති නීතිඥ රොනල්ඩ් සී. පෙරේරා, මහජන බැංකුවේ සභාපති සුජීව රාජපක්ෂ, ශ්‍රී ලංකා වරාය අධිකාරියේ සභාපති කීර්ති බර්නාඩ්, ඛනිජ තෙල් සංස්ථාවේ වෘත්තීය සමිති නියෝජිතයන්, රාජ්‍ය බැංකු සාමාන්‍යධිකාරීවරුන් හා රාජ්‍ය බැංකු ක්ෂේත්‍රයේ වෘත්තීය සමිති නියෝජිතයන්, ශ්‍රී ලංකා වරාය අධිකාරියේ වෘත්තීය සමිති නියෝජිතයන් ඇතුළු පිරිසක් මෙම අවස්ථාවට එක්ව සිටියහ.
RN
බදු පනත ඇතුළු ඉල්ලීම් සම්බන්ධයෙන් ඊයේ දිනයේදී වෘත්තීය සමිති ඒකාබද්ධව රට පුරා සිදුකරන ලද වෘත්තීය සමිති ක්‍රියාමාර්ග පිළිබඳ අවධානය යොමුකර එම ගැටලුවලට ඉදිරි දින 07 තුළ විසඳුම් නොලැබෙන්නේ නම් මාර්තු 08 සිට අයිතිවාසිකම් දිනාගන්නා තුරු වෘත්තීය සමිති ක්‍රියාමාර්ග ගන්නා බව අද (02) රාජ්‍ය හා අර්ධ රාජ්‍ය වෘත්තීය සමිති එකමුතුව අවධාරණය කළේය.
එහිදී අදහස් දැක්වූ කැඳවුම්කරු රවී කුමුදේශ් මහතා පැවසුවේ ජනධිපති රනිල් වික්‍රමසිංහ මහතා රටේ ඇත්ත වෘත්තීය සමිති මොනවාද ?කෝම්බ මොනවාද යන්න නොදන්නා බවයි.
එහෙයින් සුපුරුදු පරිදි රැවටී නැවත ගෙදර යා හැකි බවයි කුමුදේශ් මහතා පැවසුවේ.
මේ වන විටත් රටේ සෞඛ්‍ය හා අධ්‍යාපන සේවා පවත්වාගෙන යාමට ආණ්ඩුවට වුවමනාවක් නැති බවද හෙතෙ කියා සිටියේය.
”ජාත්‍යන්තර මූල්‍ය අරමුදල පවා කියනවා මානුෂික මෙහෙයුමක් කරන්න රට බංකොලොත් වෙද්දී අඩු ආදායම්ලාභියා සිය දිවි නසා ගනී කියල. ඔහු බංකොලොත් වුනහම විවිධ තීරණ ගනී කියල. හැබැයි රනිල් වික්‍රමසිංහගේ ආණ්ඩුවට ඒක තේරෙන්නෙත් නැහැ. ඒ නිසා අපි ඉතා පැහැදිලිව කියනවා රටේ වෘත්තීය සමිති එකතු වෙලා ඉන්නේ. රනිල් වික්‍රමසිංහ මහත්තයට ඕන නම් හැමදාම වැරැද්ද ගත්තා වගේ වටේ ඉන්න අය වෘත්තීය සමිති කියල කෝම්බ 500ක් 1000ක් දාලා කන්න දෙන එකට රැවටෙන්න.රැවටිලා කලින් කරගත්තා වගේ ජන්ද 30,000ක් වත් නැතුව ගෙදර යන තැන හදාගන්න. මොකද එයා දන්නේ නැහැ මේ රටේ බිමේ ඉන්න වෘත්තීය සමිති මොනවද කෝම්බ මොනවද කියල. ඒ නිසා අපි කියනවා ඕනේ නම් රැවටෙන්න අපි කරලා පෙන්වන්නම්” යනුවෙන් කුමුදේශ් මහතා වැඩිදුරටත් ප්‍රකාශ කළේය.
ආශිකා බ්‍රාහ්මණ
ජනාධිපති රනිල් වික්‍රමසිංහ මහතා සමග ඊයේ (25) දිනයේදී පැවති සාකච්ඡාව එකඟතාවකින් තොරව අවසන් වූ බව ඉහළ පෙළේ වෘත්තිකයින්ගේ වෘත්තීය සමිති එකමුතුව පවසයි.
ඒ අනුව, තමන් පෙර සැලසුම් කළ පරිදි මාර්තු 01 වනදා සිට වැඩවර්ජන ක්‍රියාමාර්ගයට එළඹෙන බවයි ඔවුන් සඳහන් කරන්නේ.
වෛද්‍ය, විශ්ව විද්‍යාල ආචාර්යවරුන්, විදුලි ඉංජිනේරුවරුන්, වරාය, බැංකු ඇතුළු ඉහළ වැටුප් ලබන වෘත්තිකයින්ගේ වෘත්තීය සමිති 40ක් පමණ මෙම සාකච්ඡාවට සහභාගී වී තිබිණි.
තම වැටුප් මත පනවා ඇති බදු කඩිනමින් අඩුකර සහන ලබාදෙන මෙන් එම වෘත්තීය සමිති බලකර තිබුණු අතර රටේ පවතින ආර්ථික අර්බුදය හමුවේ එවැන්නක් කළ නොහැකි බව මුදල් අමාත්‍යාංශය, මහබැංකුව සහ දේශීය ආදායම් දෙපාර්තමේන්තුව නියෝජනය කරන බලධාරීන් පවසා ඇති බව සඳහන්.
RN
ජෝශප් ස්ටාලින් මහතා ප්‍රමුඛ වෘත්තීය සමිති නියෝජිතයින් කණ්ඩායමක් සහ පොලීස් නිලධාරීන් අතර කොටුව රීගල් සිනමා හල අසල ඉතා උණුසුම්කාරී තත්ත්වයක් ඇති විය.
වැඩි කර තිබෙන බැංකු පොළී සහ බදු බරට එරෙහිව මුදල් අමාත්‍යාංශය වෙත සන්දේශයක් භාර දීමට පාගමනින් යෑමට සූදානම් වූ අවස්ථාවේදීයි එම උණුසුම් තත්ත්වය ඇති වූයේ.
එම අවස්ථාවට 60ක පමණ පිරිසක් සහභාගී වී සිටීම නිසා එය විරෝධතා පාගමනක් වන හෙයින් යෑමට අවසර දිය නොහැකි බවටයි පොලීසිය අවධාරණය කළේ.
ඒ අනුව පාගමනින් පාරේ යාමට තරම් හෝ ප්‍රජාතන්ත්‍රවදයක් රට තුළ නොමැතිද යන්න පවසමින් වෘත්තීය සමිති නියෝජිතයින් හා පොලීසිය අතර වාග් සංග්‍රාමයක් හට ගැනුණි.
කෙසේවෙතත් 10 දෙනෙකුට එම සංදේශය භාර දීමට අවස්ථාව දිය හැකි බවට අවසානයේ පොලීසිය ප්‍රකාශ කළ අතර ඒ අනුව සංදේශය භාර දීමට වෘත්තීය සමිති නියෝජිතයින් කටයුතු කරන ලදී.
ආශිකා බ්‍රාහ්මණ
ඉන්ධන බෙදාහැරීම හෝ බලශක්ති ක්ෂේත්‍රයේ කටයුතුවලට බාධා එල්ල කරන වෘත්තීය සමිති හා සේවකයින්ට එරෙහිව නීතිමය පියවර ගන්නා බව විදුලිබල හා බලශක්ති අමාත්‍ය කංචන විජේසේකර මහතා පවසයි.
ඒ අනුව අත්‍යාවශ්‍ය සේවා රෙගුලාසි යටතේ මෙසේ අදාළ නීතිමය පියවර ගන්නා බවයි අමාත්‍යවරයා අවධාරණය කරන්නේ.
අමාත්‍යවරයා මෙම අනතුරු හැඟවීම කර ඇත්තේ අද (18) දිනයේ පාර්ලිමේන්තුවේ විවාදයට ගන්නා ඛනිජ තෙල් නිෂ්පාදන විශේෂ විධිවිධාන පනත් කෙටුම්පතට විරෝධය පළකරමින් ඛනිජ තෙල් සංස්ථාවේ වෘත්තීය සමිති විසින් ලෙඩ නිවාඩු දැමීමේ වෘත්තීය ක්‍රියාමාර්ගයක් දියත් කර ඇති තත්වයක් තුළ ය.
RN
ලංකා ඛනිජ තෙල් නීතිගත සංස්ථාවේ වෘත්තීය සමිති අද (18) ලෙඩ නිවාඩු දැමීමේ වෘත්තීය ක්‍රියාමාර්ගයකට අවතීර්ණ වී තිබේ.
ඒ, අද දිනයේදී පාර්ලිමේන්තුවේ විවාදයට ගැනීමට නියමිත ඛනිජ තෙල් නිෂ්පාදන විශේෂ විධිවිධාන පනත් කෙටුම්පතට විරෝධය පළ කරමිනි.
මෙම වෘත්තීය ක්‍රියාමාර්ගය හේතුවෙන් ඉන්ධන බෙදාහැරීමට බලපෑම් එල්ල විය හැකි බවයි ඛනිජ තෙල් පොදු සේවක සංගමයේ සභාපති අශෝක රන්වල මහතා සඳහන් කළේ.
RN
සෞඛ්‍ය වෘත්තීය සමිති නායකයකු වන සමන් රත්නප්‍රිය මහතා ජනාධිපති වෘත්තීය සමිති අධ්‍යක්ෂ ජනරාල්වරයා ලෙස පත්කර තිබේ.
ජනාධිපති රනිල් වික්‍රමසිංහ මහතාගේ උපදෙස් පරිදි ජනාධිපති ලේකම්වරයා විසින් මෙම පත්කිරීම සිදුකර ඇත.
සමන් රත්නප්‍රිය මහතා මීට වසර කිහිපයකට පෙර කෙටි කලකට එක්සත් ජාතික පක්ෂයේ ජාතික ලැයිස්තුවෙන් පාර්ලිමේන්තු මන්ත්‍රීවරයකු ලෙස ද පත්ව සිටියේය.
RN
ප්‍රකට වාමාංශික දේශපාලන ක්‍රියාකාරිකයකු වූ ලීනස් ජයතිලක සහෝදරයා අභාවප්‍රාප්ත වී තිබේ.
ඔහුගේ දේහය හෙට (12) දිනයේදී ලංකා වෙළඳ කාර්මික හා පොදු කම්කරු සංගමයේ (CMU) බාලා තම්පෝ ශාලාවේ තැන්පත් කර තැබෙනු ඇති අතර සවස 04.00ට උස්වැටකෙයියාව නිවසට ගෙන යනු ඇත.
දේහය පිළිබඳ අවසන් කටයුතු 13 වනදා සවස උස්වැටකෙයියාව පොදු සුසාන භූමියේදී සිදුකෙරේ.
සමසමාජ පක්ෂයෙන් දේශපාලන කටයුතු ආරම්භ කළ ලීනස් ජයතිලක සහෝදරයා නව සමසමාජ පක්ෂයේත්, වමේ හඬ කණ්ඩායමේත් දේශපාලනයේ නිරත වූ අතර විශේෂයෙන්ම වෘත්තීය සමිති ව්‍යාපාරය තුළ කැපී පෙනෙන වැඩ කොටසක් ඉටු කළේය.
ඔහු වාණිජ හා කාර්මික සේවක සංගමයේ සහ එක්සත් කම්කරු සම්මේලනයේ සභාපතිවරයා වශයෙන් ද කටයුතු කළ අතර සිය ජීවිත කාලය පුරාවට සිය වාමාංශික දේශපාලන ස්ථාවරය අත් නොහැර ඒ හා බැඳී සිටි ක්‍රියාකාරිකයෙකු විය.
RN
හර්තාලයට සහය දෙමින් වැඩ වර්ජනයේ නියුතු වෘත්ති සමිති විරෝධතා පා ගමනින් පාර්ලිමේන්තු වටරවුම අසල අන්තර් විශ්ව විද්‍යාල ශිෂ්‍ය බල මණ්ඩලය විසින් ක්‍රියාත්මක අරගල භූමියට පැමිණියේය.
අද දින ක්‍රියාත්මක මෙම හර්තාලයෙන් සහ වැඩ වර්ජනයෙන් පසු ජනතා ඉල්ලීම්වලට ආණ්ඩුව සවන් නොදෙන්නේ නම් එළඹෙන 11 වැනිදා සිට අඛණ්ඩ වැඩ වර්ජනයක් හා හර්තාලයක් ක්‍රියාත්මක වනු ඇත.
ASK